AZXEBER.COM həmin paylaşımı təqdim edir:
"Azərbaycan üçün itkin düşmüş şəxslərin taleyi dərin humanitar və milli əhəmiyyət kəsb edən məsələ olaraq qalır. Keçmiş Ermənistan-Azərbaycan münaqişəsi nəticəsində 4010 Azərbaycan vətəndaşı itkin düşmüş şəxs kimi qeydiyyatdadır.
Bu məsələ Prezident İlham Əliyevin daim və yaxından diqqəti altındadır. Dövlət başçısının müəyyən etdiyi tapşırıqlara uyğun olaraq, Dövlət Komissiyası itkin düşmüş Azərbaycan vətəndaşlarının yerinin müəyyən edilməsi, qalıqlarının tapılması, şəxsiyyətlərinin müəyyənləşdirilməsi və onilliklər boyu davam edən qeyri-müəyyənlikdən sonra ailələrinə təhvil verilməsi istiqamətində sistemli fəaliyyətini davam etdirir.
Şahid ifadələri yoxlanılır, ehtimal olunan dəfn yerləri araşdırılır, kütləvi məzarlıqlarda qazıntı işləri aparılır və tapılan qalıqlar məhkəmə-tibbi ekspertiza və DNT analizi vasitəsilə tədqiq edilir. Bu günə kimi 32 kütləvi məzarlıq aşkar edilib və DNT analizi vasitəsilə 328 itkin düşmüş şəxsin şəxsiyyəti müəyyənləşdirilib.
Bu baxımdan, Ermənistan tərəfindən itkin düşmüş azərbaycanlıların taleyi, o cümlədən basdırılma yerləri barədə dəqiq və əhatəli məlumatların təqdim edilməsi vacib olaraq qalır. Belə əməkdaşlıq ilk növbədə humanitar öhdəlikdir və minlərlə ailənin onilliklər boyu yaşadığı qeyri-müəyyənliyə son qoymaq üçün zəruridir.
Çətin relyef və hava şəraitinə, həmçinin mina və partlamamış sursatların yaratdığı təhlükələrə baxmayaraq, axtarış əməliyyatları bütün mövcud resurslar və qabaqcıl texnologiyalar vasitəsilə davam etdirilir.
Hər bir ailənin öz yaxınlarının taleyini bilmək hüququ var.
Hər bir itkin düşmüş şəxsin adı var.
Hər bir ailə cavab almağa layiqdir”.
