Hindistanın əhalisi yaxın vaxtlarda azalmağa başlayacaq və bu proses, ehtimal ki, kifayət qədər sürətli olacaq.
AZXEBER.COM xəbər verir ki, bu barədə "The Economist" məlumat yayıb.
Qeyd edilib ki, nə geniş yayılmış yoxsulluq, nə yüksək nikah səviyyəsi, nə də anaların nisbətən gənc yaşda övlad sahibi olması doğum göstəricilərinin qorunub saxlanmasına kömək edir.
Gözlənilir ki, Hindistanın əhalisi qarşıdakı onilliklər ərzində azalmağa başlayacaq. Buna səbəb doğum səviyyəsinin hər qadına orta hesabla 2,0 uşağa qədər enməsidir. Bu göstərici əhalinin özünü bərpa etməsi üçün tələb olunan 2,1 uşaq səviyyəsindən aşağıdır.
Əvvəllər ailələrdə 6–11 uşaq olduğu halda, indi çoxları ən çox iki uşaq sahibi olmağa üstünlük verir, bəzi ailələr isə yalnız bir uşaqla kifayətlənir.
Bu tendensiyaya təsir edən amillərdən biri də smartfonlardır. Smartfonlar mədəni və sosial normaların daha sürətlə yayılmasına şərait yaradır.
Uttar-Pradeş ştatının Naqepur kəndində yaşayan qadınlar bildirirlər ki, sosial şəbəkələrdə kiçik ailələri təbliğ edən və gənclərin iş tapmaqda çətinlik çəkməsindən bəhs edən çoxsaylı videolar izləyirlər. Bu məzmunlar da ailələrin daha az uşaq sahibi olmaq qərarına təsir göstərir.
