Türkiyə milli müdafiə naziri Hulusi Akar Vətən müharibəsinin şəhidi, baş leytenant Valeh Məmiyevi yada salıb.
AZXEBER.COM xəbər verir ki, bu, Türkiyə milli müdafiə nazirinin hərbçilərlə görüşü zamanı baş tutub.
Valeh Məmiyevin Qubadlı rayonunun işğaldan azad edilməsi uğrunda döyüşdə "Mən xoşbəxt zabitəm ki, cənab Hulusi Akara verdiyim sözü tutdum. Təki Vətən sağ olsun!” deyərək gözlərini yumması və həkimlərin səylərinə baxmayaraq, üç gün sonra şəhid olması xəbəri Türkiyənin milli müdafiə nazirinin heç bir zaman unutmayacağı bir hadisəyə çevrilib.
Belə ki, Azərbaycan-Türkiyə birgə təlimlərinin "Yüksək Səviyyəli Müşahidəçi Günü”ndə qardaş Türkiyənin milli müdafiə naziri Valehi qiymətli hədiyyə ilə şəxsən mükafatlandırmış və torpaqlarımızın işğaldan azad edilməsi uğrunda mübarizədə ona uğurlar arzulamışdı. Valeh Hulusi Akara söz vermişdi ki, birgə təlimlərdə qazandığı uğurları döyüş meydanında təkrarlayacaq və bu yüksək etimadı Vətənə xidməti ilə doğruldacaq, son damla qanınadək vuruşaraq düşmən üzərində qələbə çalacaq.
Hulusi Akar görüş zaman deyib ki, "Valehə dedim ki, təlimləri yaxşı bacardınız, uğurlu oldu, amma bu böyük nailiyyət deyil, önəmli olan torpaqlar işğal altındadır, onu azad etmək lazımdır. 1 milyon insan evsiz qalıb, bunu bacarmalısan. Onun da gözləri yaşardı, bizim də. O, mənə söz verdi. Sonra illər keçdi, dedilər ki, Valeh şəhid oldu. Xəstəxanada yatarkən bizim çəkdiyimiz fotonu çıxartmış və deyib ki, Hulusi Akara söyləyin, mən sözümü tutdum”, deyə bildirib.
Qeyd edək ki, Valeh Məmiyev Vətən müharibəsi zamanı Cəbrayılın, Füzulinin, Zəngilanın və Qubadlının azadlığı uğrunda gedən döyüşlərdə tank komandiri kimi iştirak edib. Oktyabrın 19-da Qubadlı döyüşləri zamanı ağır yaralanıb və 4 gün sonra aldığı yaradan şəhid olub.
Ayşən
