İş Adamları Cəmiyyətinin Milli Assosiasiyası (İCMA) və Marsol Group-un birgə təşkilatçılığı ilə Şimali Kipr Türk Respublikasının Səhiyyə naziri Hakan Dinçyürek ilə səhiyyə sektorunda fəaliyyət göstərən sahibkarların iştirakı ilə işgüzar görüş baş tutub.
AZXEBER.COM xəbər veirr ki, iyulun 2-də keçirilən "Axşam Ziyafəti" çərçivəsində təşkil olunan görüşdə səhiyyə sahəsində fəaliyyət göstərən İCMA üzvləri və sahibkarlar iştirak ediblər. Görüş zamanı Azərbaycan ilə Şimali Kipr Türk Respublikası arasında səhiyyə sahəsində əməkdaşlıq perspektivləri, özəl sektorun inkişafı, investisiya imkanları, tibbi xidmətlərin təkmilləşdirilməsi və qarşılıqlı təcrübə mübadiləsi ətrafında geniş fikir mübadiləsi aparılıb.
Tədbirdə çıxış edən Şimali Kipr Türk Respublikasının Səhiyyə naziri Hakan Dinçyürek səhiyyə sahəsində beynəlxalq əməkdaşlığın əhəmiyyətini vurğulayaraq, Azərbaycan və Şimali Kipr arasında tibbi xidmətlər, səhiyyə idarəçiliyi, innovativ həllər və özəl sektor əməkdaşlığının genişləndirilməsi üçün böyük potensialın mövcud olduğunu bildirib. Nazir bu kimi işgüzar görüşlərin yeni tərəfdaşlıqların qurulmasına və qarşılıqlı təcrübə mübadiləsinin güclənməsinə mühüm töhfə verdiyini qeyd edib.
Tədbirdə İş Adamları Cəmiyyətinin Milli Assosiasiyasının İdarə Heyətinin sədri və Marsol Group-un təsisçisi Tural Mustafayev çıxış edərək sahibkarlar arasında beynəlxalq əməkdaşlığın genişləndirilməsinin, xüsusilə səhiyyə sahəsində yeni tərəfdaşlıqların qurulmasının əhəmiyyətini vurğulayıb.
Görüşdə həmçinin Şimali Kipr Türk Cümhuriyyətinin Bakıdakı nümayəndəliyinin rəhbəri Ufuk Turganer, Şimali Kipr Türk Respublikasının parlamentində Ulusal Birlik Partiyasının Lefkoşa millət vəkili Ahmet Savaşan və Marsol Group-un Şimali Kipr nümayəndəsi İlhami Bilgen çıxış edərək səhiyyə sahəsində əməkdaşlığın inkişafı, ortaq layihələrin həyata keçirilməsi və sahibkarlar arasında əlaqələrin gücləndirilməsinin vacibliyini qeyd ediblər.
Görüş Azərbaycan və Şimali Kipr Türk Respublikası arasında səhiyyə sahəsində əməkdaşlığın genişləndirilməsinə, səhiyyə turizmi üzrə yeni tərəfdaşlıqların qurulmasına və özəl sektor nümayəndələri arasında əlaqələrin möhkəmləndirilməsinə töhfə verib.
Görüşün sonunda tərəflər bir-birinə xatirə hədiyyələri təqdim edib, sahibkarlarla birgə xatirə fotosu çəkilib.
