Martın ayında İctimai Televiziya və Radio Yayımları Şirkətinin Yayım Şurasının yeni sədri seçilməli olsa da, bu proses ləngiyir.
AZXEBER.COM xəbər verir ki, televiziyanın yayım şurasının yeni üzvlərinin mart ayının 15-20 tarixlərində Azərbaycan Milli Məclisinin iclasında təsdiqlənəcyi gözlənilsə də, proses bilinməyən səbəblərdən gecikir. Belə ki, artıq bir neçə gün öncə yayım şurasının yeni sədri və üzvləri Milli Məclis tərəfindən təsdiqlənməli idi.
İTV Yayım Şurasının hazırki sədri Cahangir Məmmədli məsələylə bağlı AZXEBER.COM-a açıqlamasında deyib ki, bütün üzvlərlə bağlı məlumat Milli Məclisə göndərilir və Məclis üzvləri təsdiqləyir: "Yəqin ki, bu məsələ yaxın günlərdə iclasların birinin gündəliyinə salınacaq və üzvlər təsdiqlənəcək".
Qeyd edək ki, Azərbaycan Respublikasının Milli Məclisinin 15 mart 2005-ci il və 18 mart 2011-ci il tarixli qərarları ilə Şuranın namizədi olan Bakı Dövlət Universitetinin dekanı Cahangir Məmmədli Yayım Şurasında təmsil olunub. Onun səlahiyyət müddəti 18 mart 2017-ci il tarixdə başa çatıb.
