Xəbər verdiyimiz kimi, Qafqazinfo-ya müraciətində Kəmalə Salayeva adlı müştəri "İdeal"dan aldığı 469 manat dəyərində ətrin iyinin qalıcı olmadığını söyləyib. Müştəri məhsulun saxta olduğunu bildirib.
"Fevralın 13-də "İdeal"ın "Gənclik Mall"dakı filialından 10 faiz endirimlə 469 manata "Roja" parfümü aldım. Evdə açıb vuranda ətrin iyinin qalıcı olmadığını hiss etdim. Elə bil su vurdum. Bu ətirdən mütəmadi istifadə etdiyimçün budəfəkinin orijinal olmadığını düşündüm. Onu mağazaya aparıb başqa ətir ilə dəyişdirilməsini və ya pulumu geri qaytarmalarını xahiş etdim. Mənə heç nə edə bilməyəcəklərini dedilər. Ətri mağazada qoydum və onlardan cavab gözləyəcəyimi bildirdim. Dəfələrlə mağaza ilə, menecer ilə əlaqə saxlasam da nəticə olmadı. Hər dəfə müxtəlif bəhanələr gətirirlər, incidirlər".
Məsələ ilə bağlı "İdeal" Parfümeriya və Kosmetika Mağazaları Şəbəkəsindən qafqazinfo-ya bildirilib ki, qeyd edilən şikayət araşdırılıb: "Məhsul istifadə edilib, qalıcılığı ilə problem yoxdur. Məhsulun orijinallığı barədə ofis və ya mağazamıza yaxınlaşıb, sertifikatlarla tanış ola bilərsiniz. İstifadə edilmiş məhsullar geri qaytarılmır və əvəzlənmir".
Mövzu ilə bağlı AZXEBER.COM-a danışan Azad İstehlakçılar Birliyinin sədri Eyyub Hüseynov münasibət bildirib. O, son illərdə parfümeriya bazarında ən çox "İdel"dan şikayətlərin gəldiyini və ictami birlik olaraq dəfələrlə bu barədə şirkət rəsmilərinə məlumat verdiklərini söyləyib:
"Ən çox istehsalçılar tərəindən şikayətlər "İDEAL" Mağazalar Şəbəkəsindən daxil olur. Əsas şikayətlər isə parfümeriya mağazasının müştərilərə verdiyi hədiyyə kartları ilə bağlıdır. Belə ki, 100 manat hədiyyə kartı əldə edən müştərilər müəyyən müddət sonra mağazaya yaxınlaşanda vaxtının bitdiyini söyləyilər. Bu sayda şikayətlər "İdeal"da çoxlu saydadır. Biz dəfələrlə bu barədə şirkətə müraciət etsək də heç bir tutarlı addım atılmayıb".
E.Hüseynov Azərbaycanda gətirilən parfümeriya məhsullarının çoxununü üzərində istehsal tarixlərinin yazılmadığını və bu məhsulların Çin istehsalı olduğunu deyib:
"İstehsal tarixi üzərində olmayan məhsulların çoxu Çin istehsalıdır. İstehlakçılar bu barədə diqqətli olmalıdırlar. Bu məhsulların çoxu hər gün reklamları gedən mağazalar şəbəkələrində satılır".
