"44 günlük Vətən Müharibəsində Azərbaycan təkcə cəbhədə deyil, siyasi meydanda, informasiya savaşında qələbə qazandı".
Bu fikirləri AZXEBER.COM-a Diaspor İnformasiya Mərkəzinin rəhbəri, "İnterpress.az" informasiya portalının baş redaktoru Toğrul Allahverdili 44 günlük Vətən Müharibəsindən bəhs edərkən deyib.
O bildirib ki, qələbələrimizin əsas memarı Prezident İlham Əliyevdir:
"Təbii ki, bu qələbələrin hər birinin başında Müzəffər Ali Baş Komandan cənab İlham Əliyev dururdu. İlham Əliyev həm Azərbaycan Ordusunun Ali Baş Komandanı kimi əsgərlərimizin döyüş tapşırığının yerinə yetirilməsində bir örnək idi, həm də Azərbaycan siyasətçilərinin siyasi arenada düşmənə layiqli cavab verilməsi önündə gedirdi, həm də bunu mən şərəflə, sevincli deyirəm ki, o informasiya savaşçılarının önündə idi. Bizim komandirimiz, liderimiz idi. Biz ondan nümunə götürərək informasiya cəbhəsində savaşırdıq".
Jurnalist əlavə edib ki, 44 günlük Vətən Müharibəsi dönəmində informasiya savaşında jurnalistlər Prezident İlham Əliyevin mübarizliyinə baxıb ilhamlanırdılar:
"Cənab Prezident İlham Əliyev informasiya savaşında hər birimizə örnək oldu. O, bizim önümüzə öz çıxışlarıyla informasiya müharibəsində yol xəritəsi qoydu.
Bu gün Vətən Müharibəsi başa çatıb. Artıq iki ildir ki, biz Vətən Müharibəsindəki Zəfərin dadını çıxardırıq. Zəfər bayramımıza hazırlaşırıq. Lakin informasiya müharibəsi bu gün hər bir cəbhədə davam edir. Dünyanın istənilən nöqtəsində yaşayan soydaşlarımız, Azərbaycanı beynəlxalq arenada tanıdan dəyərli təmsilçiləri informasiya savaşında öz mübarizələrini davam etdirirlər".
Toğrul Allahverdili qeyd edib ki, bəzi ölkələr var ki, özlərini bizə dost kimi tanıtsalar da, bizim qələbəmizi həzm edə bilmirlər:
"Özlərini bizə dost, qonşu kimi təqdim edən dövlətlər var ki, iki illik savaşımızı həzm edə bilmirlər. Lakin biz yenə də bütün bu təxribatlara baxmayaraq, informasiya savaşını davam etdiririk. Misal üçün, Cənab Prezidentin son çıxışlarında, müsahibələrində də biz bunu görürük. Cənab Prezidentin istər dünyanın nüfuzlu televiziyalarına verdiyi müsahibələr, istər beynəlxalq arenalardakı çıxışları, Avropada, Asiyada və digər ölkələrdə qəbul olunan, sevilən bir lider olması informasiya müharibəsində Azərbaycan gəncinin qarşısına çox böyük öhdəliklər qoyur. Bizim artıq informasiya savaşını uduzmağa haqqımızın olmadığını göstərir. Çünki biz elə bir liderin rəhbərliyi altında yaşayırıq ki, haqqımız çatmaz ki, biz məğlub olaq".
Jurnalist sonda dünya azərbaycanlılarına səslənərək onları informasiya müharibəsində aktiv olmağa çağırıb:
"Mən bir daha fürsətdən istifadə edib Müzəffər Ali Baş Komandanın rəhbərliyi ilə Şanlı Zəfər çalan Ordumuz başda olmaqla, bütün xalqımızı, dünya azərbaycanlılarını Zəfər günü münasibətilə təbrik edirəm və hər birinə yeni-yeni zəfər bayramları arzu edirəm. Biz informasiya müharibəsində yetərincə çalışmalıyıq, savaşmalıyıq. Bir daha dünyadakı bütün azərbaycanlıları informasiya müharibəsində aktiv olmağa səsləyirəm".
Mikayıl Mirzəzadə
