Sentyabrın 8-də Azərbaycan Respublikasının prezidenti İlham Əliyevin yanında iqtisadi məsələlərə və 2016-cı ilin dövlət büdcəsinin hazırlığı işlərinə həsr edilmiş müşavirə keçirilib.
Dövlət başçısı İlham Əliyev müşavirədə çıxış edib.
Sentyabrın 1-də Nazirlər Kabinetində 2016-cı il üzrə dövlət büdcəsinin və icmal büdcənin layihələri, sonrakı üç il üçün icmal büdcənin göstəriciləri, həmçinin Azərbaycan Respublikasının 2016-cı il və gələn üç il üzrə iqtisadi və sosial inkişaf konsepsiyası və proqnoz göstəriciləri müzakirə edilmişdi.
Maliyyə naziri Samir Şərifov və iqtisadiyyat və sənaye naziri Şahin Mustafayev həmin müşavirədə gündəlikdə duran məsələlərə dair məruzə ilə çıxış etmişdilər.
Büdcə layihəsi ətrafında aparılan geniş müzakirələrin yekununda “Büdcə sistemi haqqında” qanuna uyğun olaraq büdcə zərfinə daxil olan sənədlər toplusunun Azərbaycan prezidentinə təqdim edilməsi barədə qərar qəbul edilmişdi.
