Azərbaycan Prezidenti İlham Əliyevin 4 may 2026-cı il tarixində Avropa Siyasi Birliyi Zirvəsinin 8-ci toplantısında videobağlantı formatında etdiyi çıxış regionda baş verən siyasi proseslərin qiymətləndirilməsi baxımından xüsusi əhəmiyyət daşıyır. Dövlət başçısının səsləndirdiyi fikirlər bir daha göstərdi ki, Azərbaycan Cənubi Qafqazda davamlı sülhün və sabitliyin təmin olunması istiqamətində ardıcıl və prinsipial siyasət həyata keçirir.
Prezident İlham Əliyevin çıxışında Azərbaycan və Ermənistan arasında münasibətlərin normallaşması istiqamətində əldə olunan irəliləyişlərə xüsusi diqqət yetirilməsi təsadüfi deyil. Son dövrlərdə qarşılıqlı etimadın gücləndirilməsi, dialoqun genişlənməsi və praktiki addımların atılması regionda yeni siyasi reallıqlar formalaşdırır. Dövlət başçısının "Azərbaycan və Ermənistan arasında sülh artıq reallığa çevrilməkdədir və biz bu prosesi ardıcıl şəkildə irəli aparmaq əzmindəyik” fikri Azərbaycanın sülh gündəliyinə sadiqliyini açıq şəkildə nümayiş etdirir.
Müasir dövrdə regional sabitliyin yalnız siyasi bəyanatlarla deyil, iqtisadi əməkdaşlıq və qarşılıqlı faydalı layihələrlə möhkəmləndiyi danılmaz faktdır. Prezident İlham Əliyevin də vurğuladığı kimi, yeni nəqliyyat və ticarət imkanlarının açılması region ölkələri arasında əməkdaşlığın genişlənməsinə və iqtisadi inteqrasiyanın güclənməsinə xidmət edir. Bu yanaşma həm region xalqlarının rifahına, həm də uzunmüddətli sülhün təmin olunmasına mühüm töhfə verə bilər.
Çıxış zamanı Azərbaycanın Avropanın enerji təhlükəsizliyində oynadığı rolun xüsusi qeyd olunması da diqqət çəkən məqamlardan biridir. Bu gün Azərbaycan etibarlı enerji tərəfdaşı kimi Avropanın enerji təminatında mühüm yer tutur. Ölkəmizin həyata keçirdiyi enerji layihələri təkcə iqtisadi əhəmiyyət daşımır, eyni zamanda beynəlxalq əməkdaşlığın və qarşılıqlı etimadın möhkəmlənməsinə xidmət edir.
Bütövlükdə Prezident İlham Əliyevin Zirvə toplantısındakı çıxışı Azərbaycanın regionda sülhün, əməkdaşlığın və dayanıqlı inkişafın tərəfdarı olduğunu bir daha nümayiş etdirdi. Dövlət başçısının səsləndirdiyi mesajlar Cənubi Qafqazda yeni əməkdaşlıq mühitinin formalaşması baxımından mühüm siyasi əhəmiyyət daşıyır.
Nəzmi Musayev
Göygöl RMX PHŞ Reanimasiya şöbəsinin müdiri
