10 aprel tarixində Bakıda Özbəkistanın məşhur komediyası "Çimıldık" filminin təntənəli Qala Gecəsi baş tutub.
AZXEBER.COM xəbər verir ki, tədbir iki hissədən ibarət olub.
Tədbirin rəsmi hissəsində çıxış edən Özbəkistanın Azərbaycandakı səfiri Bahrom Aşrafxanov çıxış edərək hər iki ölkənin bütün sahələrdə yüksək əlaqələrə malik olduğunu deyib.
Daha sonra Azərbaycan və Özbəkistanın məşhur ifaçıları sevilən mahnılarını ifa ediblər.
Konsertdən sonra filmin ulduzları, gələn qonaqlarla birlikdə Park Cinemada filmi izləyiblər.
Komediya janrında çəkilən film 96 dəqiqə təşkil edib. Özbək dilində olan film Azərbaycan dilinə tərcümə edilərək, yayımlanıb. Film Şöhrət Salomovun rejissiorluğu ilə çəkilib.
Dadaxon Obidov, Sitora Alimcanova, Muxammadiso Abdulxairov, Xosiyat Xusanova, Tolib Muminov, Muyassar Berdikulova, Dilşodbek Kattabekov, Zuxra Soliyeva, Səid Muxtorov, Bobur Aytbağanbetov, Moxlaroy Sobirova, Bobur Pirmatov, Aziza Abdullayeva, Karomat İsamova və Nurcahon Xaydarov kimi aktyor və aktrisalar filmdə rol alıblar.
Qeyd edək ki, komediyada sevib evlənən Tohir və Zuxranın həyatından bəhs edilir. Bu gənc cütlük bir-birini çox sevsə də, kiçik ailə fikir ayrılıqları üzündən boşanmaq qərarına gəlirlər. Boşanma ilə bağlı məhkəmə qərarını aldıqdan sonra onlar özlərini rahat hiss edirlər və dərhal yeni, azad həyat üçün müxtəlif istiqamətlərə yola düşürlər. Lakin tale onlara gözlənilməz sürprizlər yaşadır. Onlar gecələr harda yuxuya getməsindən asılı olmayaraq, hər səhər incəsənət muzeyində quraşdırılmış çimildik – ilk toy gecəsini simvolizə edən ənənəvi toy çadırının içərisində oyanırlar.
Film bu gündən kinoteatrlarda nümayiş etdirilir.
