Çində pandemiyanın episentri olan Vuhandan COVID-19-un ilkin mərhələlərini sənədləşdirdiyi üçün dörd il həbs cəzası alan çinli jurnalistə yenidən əlavə olaraq dörd il həbs cəzası verilib.
AZXEBER.COM xəbər verir ki, bu barədə Reuters-a Sərhədsiz Reportyorlar birliyindən məlumat verilib.
Məlumata görə, 42 yaşlı Çjan Çjan "qarışıqlıq salmaq və dava-dalaş yaratmaq" ittihamı ilə məhkum edilib. Bu, onun 2020-ci ilin dekabrında həbs olunmasına səbəb olan ittihamdır. O zaman o, Vuhan şəhərindən koronavirusun ilkin yayılması barədə birbaşa məlumatlar paylaşmışdı.
Çinin Xarici İşlər Nazirliyindən bazar günü şərh almaq mümkün olmayıb. Reuters jurnalistin hüquqi nümayəndəsinin olub-olmadığını müəyyən edə bilməyib.
Qeyd edək ki, Çjan ilkin olaraq bir neçə ay davam edən paylaşımlarından sonra həbs edilmişdi. O, dolu xəstəxanalardan və boş küçələrdən videolar da daxil olmaqla məlumatlar yayaraq xəstəliyin rəsmi versiyadan daha ağır mənzərəsini təqdim etmişdi. O dövrdəki vəkili Ren Quanniu demişdi ki, Çjan özünü "ifadə azadlığını həyata keçirdiyi üçün təqib olunmuş" hesab edir.
