Bu gün İngiltərə Premyer Liqasının 34-cü turunda "Liverpul” "Tottenhem”i qəbul edəcək. "Qırmızılar”a çempionluqlarını elan etmək üçün cəmi bir xal yetərlidir.
"Enfild”də baş tutacaq matçı baş hakim Tomas Bremell idarə edəcək.
"Liverpul” hazırda 19 liqa tituluna sahibdir, sonuncusu 2019/2020 mövsümündə Yürgen Kloppun başçılığı altında olub. Bugünkü oyunda qələbə və ya heç-heçə ilə Mersisayd təmsilçisi nəinki çempion olacaq, həm də bu göstəricidə əzəli rəqibi "Mançester Yunayted”lə bərabərləşəcək. "Qırmızı şeytanlar” sonuncu – 20-ci titulu Aleks Ferqüsonun dövründə – 2012/2013 mövsümündə qazanıb.
"Liverpul” – "Mançester Yunayted” qarşıdurması İngiltərə futbolunun ən vacib rəqabətlərindən biridir. Son illərdə "Liverpul” təkcə kuboklar baxımından "Mançester Yunayted”i geridə qoyaraq İngiltərənin ən titullu klubu ünvanını özünə qaytarıb. Mersisaydlıların hazırda 19 İngiltərə çempionluğu və 6 avrokubok da daxil olmaqla 68 kubok, "Mançester Yunayted”in isə 67 mükafatı var. Beləliklə, "Liverpul” 20-ci əsrin böyük bir hissəsində əldə etdiyi tarixi üstünlüyü bərpa edib.
Arne Slotun yetirmələri 33 oyuna 79 xal qazanıblar. Onların ən yaxın təqibçisi Mikel Artetanın "Arsenal”ıdır – 34 oyuna 67 xal. "Arsenal”ın çempionluq üçün riyazi şansları olsa da, bu, xəyali görünür. Bunun üçün "qırmızılar” mövsümün son beş oyununda ancaq məğlub olmalı, "topçular” isə son dörd matçda yalnız qələbə qazanmalıdır.
///report
