İngiltərənin şərq sahillərində yerləşən Norfolk qraflığının Happisburq kəndi növbəti 25 il ərzində tamamilə dənizə qərq olmaq təhlükəsi ilə üz-üzədir.
AZXEBER.COM Türkiyə mətbuatına istinadən xəbər verir ki, 1990-cı illərdən bəri bölgədə 250 metrdən çox sahil xətti yoxa çıxıb. Uzun illər boyunca həm təbii gözəllikləri, həm də tarixi ilə tanınan kənd artıq ciddi ekoloji və yaşayış təhlükəsi ilə gündəmdədir.
Happisburqun simvollarından sayılan 235 illik mayak hazırda Şərqi İngiltərənin ən qədim aktiv mayakı olmaqla yanaşı, Böyük Britaniyada müstəqil şəkildə idarə olunan yeganə nümunədir.
İqlim mütəxəssisi Dr. Ian Richards sahil eroziyasının gözləniləndən daha sürətlə irəlilədiyini bildirir:
"Bu yerlərdə baş verənlər artıq fərziyyə deyil, gözümüzün qabağında baş verən reallıqdır. Evlər dağılır, yollar itir və sahil xətti sürətlə geri çəkilir.”
Kənd sakinləri isə gələcək barədə fərqli fikirlərdədirlər. Bəziləri Happisburqun 1086-cı il tarixli Qiyamət Günü Kitabında (Domesday Book) qeyd olunmasına əsaslanaraq onun hələ uzunömürlü olacağına inanır.
Digərləri isə pessimist yanaşır: "Dəniz həmişə haqqını sonunda alır. Bəzən dayanır, amma heç vaxt tam dayanmır,” – deyə bir sakin sosial mediada yazıb. Başqa bir sakin isə vəziyyətə belə münasibət bildirib: "Daha bir mil eroziya və mənim evim çimərlik mülkünə çevriləcək.”
Qeyd edək ki, kənddə və ətraf ərazilərdə sahil eroziyasının qarşısını almaq üçün həyata keçirilən tədbirlərin, xüsusilə qaya baryerlərinin effekt vermədiyi vurğulanır. Hemsby bölgəsində özəl şəkildə maliyyələşdirilən sahil müdafiəsi sistemi qısa müddət ərzində dəniz tərəfindən məhv edilib və çimərlikdə yalnız qaya qalıqları qalıb. Bölgənin qumlu torpaq quruluşu isə sahil müdafiəsində ciddi zəiflik yaradır.
Gülşad İbrahimova
