İnsanla ilk dəfə qarşılaşdığımız zaman onun haqqında müəyyən fikir formalaşdırmağımız üçün uzun söhbətə ehtiyac olmur. Görünüş, üz ifadəsi, bədən dili və davranış kimi detalları beynimiz çox qısa müddətdə qiymətləndirərək qarşı tərəf haqqında ilkin təəssürat yaradır.
AZXEBER.COM xəbər verir ki, araşdırmalar göstərir ki, insan beyni qarşısındakı şəxslə bağlı ilkin qiymətləndirməni saniyənin çox kiçik bir hissəsində belə həyata keçirə bilər. Xüsusilə etibarlılıq və simpatiya kimi xüsusiyyətlər barədə ilkin fikir olduqca sürətlə formalaşır.
İlk təəssüratın yaranmasında şəxsin geyimi, mimikası, göz kontaktı, səs tonu və bədən dili mühüm rol oynayır. Məsələn, gülümsəmək və göz kontaktı qurmaq qarşı tərəfdə daha müsbət fikir yarada bilər. Əksinə, gərgin bədən dili və soyuq davranış mənfi təəssürat formalaşdıra bilər.
Lakin ilk təəssürat həmişə insanın real xarakterini əks etdirmir. Çünki beynin saniyələr ərzində verdiyi qərar məhdud məlumatlara əsaslanır və insanı daha yaxından tanıdıqca bu fikir dəyişə bilər.
Mütəxəssislərin fikrincə, ilk təəssürat sürətli olsa da, bir insan haqqında düzgün nəticəyə gəlmək üçün onu daha uzun müddət müşahidə etmək və ünsiyyət qurmaq lazımdır.
Şahanə Ziyad
