Dünyada elə ölüm hadisələri var ki, üstündən uzun illər keçsə də, hələ də müzakirə olunur. Bəzi hadisələrlə bağlı rəsmi nəticələr açıqlansa da, suallar tam cavablandırılmayıb. Digər hallarda isə cinayətin sifarişçiləri və ya hadisənin bütün detalları müəyyən edilməyib.
Siyasətçilərin, jurnalistlərin, musiqiçilərin və kino ulduzlarının müəmmalı ölümləri xüsusilə böyük maraq doğurur. Bu hadisələrlə bağlı müxtəlif iddialar illərdir gündəmdə olsa da, hər iddianı sübut olunmuş fakt kimi qəbul etmək olmaz.
AZXEBER.COM dünyada ən çox müzakirə edilən məşhur şəxslərin ölüm hadisələrini araşdırıb.
Jeffrey Epşteynin həbsxanada ölümü
Amerikalı maliyyəçi Jeffrey Epstein 2019-cu il avqustun 10-da Nyu-Yorkda həbsxana kamerasında ölü tapılıb. O, azyaşlıların cinsi istismarı və insan alveri ilə bağlı ittihamlarla həbsdə saxlanılırdı.
Epşteynin ölümü böyük müzakirələrə səbəb olub. Bunun səbəblərindən biri onun siyasətçilər və digər tanınmış şəxslərlə əlaqələrinin olması idi. Hadisədən sonra həbsxanada təhlükəsizliyin niyə təmin edilmədiyi və onun necə nəzarətsiz qaldığı barədə suallar yaranıb.
ABŞ Ədliyyə Nazirliyinin 2023-cü il hesabatında həbsxana əməkdaşlarının ciddi səhvlərə yol verdiyi bildirilib. 2025-ci ildə açıqlanan rəsmi nəticələrdə də Epşteynin intihar etdiyi qənaəti təsdiqlənib. Onun öldürüldüyünü sübut edən rəsmi dəlil açıqlanmayıb.
Natali Vudun ölümü: Qəza idi, yoxsa başqa səbəb var?
Hollivud aktrisası Natalie Wood 1981-ci il noyabrın 29-da Kaliforniya sahillərində, Santa-Katalina adası yaxınlığında suda ölü tapılıb. Hadisə zamanı həyat yoldaşı Robert Vaqner və aktyor Kristofer Uoken də yaxtada olublar.
Aktrisanın ölümü əvvəlcə suda boğulma nəticəsində baş vermiş qəza kimi qeydə alınıb. Lakin sonradan hadisənin detalları ilə bağlı yeni suallar yaranıb və araşdırma yenidən gündəmə gəlib.
2012-ci ildə ölüm şəhadətnaməsi dəyişdirilərək ölüm səbəbi "boğulma və müəyyən edilməmiş digər amillər” kimi göstərilib. Aktrisanın suya hansı şəraitdə düşdüyü dəqiq müəyyən edilməyib.
Vudun qətlə yetirildiyini təsdiqləyən qəti nəticə yoxdur. Onun ölümü ilə bağlı əsas sual hadisənin necə baş verməsidir.
BMT-nin baş katibi Daq Hammarskyöldün təyyarə qəzası
BMT-nin ikinci baş katibi Dag Hammarskjöld 1961-ci il sentyabrın 18-də indiki Zambiya ərazisində, Ndola yaxınlığında baş verən təyyarə qəzasında həlak olub.
O, Konqodakı böhranla bağlı diplomatik səfərdə idi. Ölümündən sonra qəzanın pilot səhvi nəticəsində baş verməsi və təyyarəyə kənardan müdaxilə edilməsi ehtimalları araşdırılıb.
BMT-nin 2017-ci ildə açıqladığı qiymətləndirmədə təyyarənin hücuma məruz qalması ehtimalının araşdırılmalı olduğu bildirilib. Bununla belə, qəzanın dəqiq səbəbi müəyyən edilməyib.
Hammarskyöldün ölümü beynəlxalq diplomatiya tarixinin ən çox müzakirə edilən hadisələrindən biri olaraq qalır. Lakin təyyarənin qəsdən vurulduğunu təsdiqləyən qəti nəticə yoxdur.
Jurnalist Anna Politkovskayanın qətli
Rusiyalı araşdırmaçı jurnalist Anna Politkovskaya 2006-cı il oktyabrın 7-də Moskvada yaşadığı binanın girişində güllələnərək öldürülüb.
O, əsasən Çeçenistanda insan hüquqlarının pozulması və zorakılıq halları ilə bağlı yazıları ilə tanınıb. Jurnalistin fəaliyyəti onun qətlinin mümkün səbəbləri ilə bağlı çoxsaylı suallar yaradıb.
Cinayət işi üzrə bir neçə nəfər məhkum edilsə də, qətlin sifarişçilərinin müəyyənləşdirilməsi məsələsi uzun müddət açıq qalıb. Avropa İnsan Hüquqları Məhkəməsi 2018-ci ildə Rusiyanın qətlin araşdırılması ilə bağlı öhdəliklərini lazımi səviyyədə yerinə yetirmədiyi qənaətinə gəlib.
Politkovskayanın ölümü jurnalistlərin təhlükəsizliyi və söz azadlığı baxımından da böyük əhəmiyyət daşıyır.
Natalya Estemirovanın müəmmalı qətli
Rusiyalı hüquq müdafiəçisi Natalia Estemirova 2009-cu il iyulun 15-də Çeçenistanın Qroznı şəhərində qaçırılıb. Onun meyiti həmin gün qonşu İnquşetiya Respublikasında tapılıb.
Estemirova Çeçenistanda qanunsuz həbslər, işgəncələr və adam oğurluqları ilə bağlı araşdırmalar aparırdı. Bu fəaliyyətinə görə təhlükələrlə üzləşdiyi bildirilirdi.
Qətldən sonra müxtəlif ehtimallar araşdırılıb. Rusiya istintaqı şübhəli şəxslərdən birinin adını açıqlasa da, beynəlxalq hüquq müdafiə təşkilatları hadisənin bütün təfərrüatlarının aydınlaşdırılmadığını bildiriblər.
Onun qətlinin peşə fəaliyyəti ilə əlaqəli olub-olmaması ətrafında suallar hələ də müzakirə edilir.
Kurt Kobeynin ölümü
Nirvana qrupunun solisti Kurt Cobain 1994-cü il aprelin 5-də, 27 yaşında vəfat edib. Onun meyiti aprelin 8-də ABŞ-ın Sietl şəhərindəki evində tapılıb.
Rəsmi araşdırmaya əsasən, Kobeyn intihar edib. Lakin onun ölümündən sonra hadisənin başqa səbəblərlə bağlı ola biləcəyi barədə müxtəlif iddialar yayılıb.
Sietl polisi 2014-cü ildə işi yenidən nəzərdən keçirib, lakin əvvəlki nəticəni dəyişdirmək üçün əsas olmadığını bildirib. 2026-cı ildə yayılan məlumatlarda da rəsmi qurumların ölümün intihar olması ilə bağlı mövqeyini dəyişmədiyi qeyd edilib.
Kobeynin gənc yaşda vəfat etməsi və dünya miqyasında məşhur olması hadisəyə marağı daha da artırıb. Ancaq müxtəlif fərziyyələr onun qətlə yetirildiyini sübut etmir.
Şahzadə Diananın ölümü: Qəza, yoxsa sui-qəsd?
Böyük Britaniya kral ailəsinin üzvü, şahzadə Diana 1997-ci il avqustun 31-də Parisdə avtomobil qəzasında həlak olub. Qəza zamanı onunla birlikdə olan Dodi əl-Fayed və sürücü Anri Pol da ölüb.
Hadisədən sonra avtomobilin yüksək sürətlə hərəkət etməsi, paparatsilərin onları izləməsi və sürücünün vəziyyəti ilə bağlı suallar yaranıb. Diananın qəsdən öldürüldüyü barədə iddialar da illərlə müzakirə olunub.
2008-ci ildə Londonda keçirilən məhkəmə-istintaq dinləməsinin nəticəsində münsiflər heyəti Diananın və Dodi əl-Fayedin ölümünü sürücünün və onları izləyən paparatsilərin kobud səhlənkarlığı ilə əlaqələndirib. Təhlükəsizlik kəmərlərindən istifadə edilməməsinin də ölümlərdə rol oynadığı bildirilib.
Buna baxmayaraq, sui-qəsd iddiaları ictimai müzakirələrdə qalır. Lakin Diananın qəsdən öldürüldüyünü təsdiqləyən rəsmi nəticə yoxdur.
Fəridə Əsədzadə
