Xəbər verdiyimiz kimi İranda baş tutan prezident seçkilərinin nəticələrinə görə İranın Ali təhlükəsizlik şurasının keçmiş katibi Həsən Ruhani ölkənin yeni prezidenti təyin edildi. Seçkilərdən sonra mətbuat konfransı keçirən ölkə başçısı bildirib ki, onun üçün ən vacib məsələ ölkə iqtisadiyyatını genişləndirməkdir.
Həsən Ruhaninin hakimiyyətə gəlişindən sonra İran-Azərbaycan münasibətlərində baş verəcək mümkün dəyişikliklərlə bağlı politoloq Qabil Hüseynlinin fikirlərini öyrəndik. Qabil Hüseynli AZXEBER.COM-a açıqlamasında bildirdi ki, İran Azərbaycan münasibətlərində hansısa bir dəyişiklik haqqında danışmaq hələ ki, çox tezdir. Çünki H. Ruhani şərti, islahatçı prezident sayılır: “İran-Azərbaycan münasibətlərini proqnazlaşdırmaq çox çətindir. Çünki yeni prezidentin seçilməsi ölkələr arasında münasibətin dəyişməsindən xəbər vermir. İranda prezidentlik simvolikdir. Burada rəhbərlik ölkənin Ali Dini liderinin üzərinə düşür. Sırf bu baxımdan ölkələr arasında baş verə biləcək iqtisadi problem, ya da ki siyasi dəyişiklik barədə danışmaq çox tezdir. İranın təkcə Azərbaycanla yox, bütün Qərblə problemi var. Bəzən İran tərəfi bu problemlərin baş verməsində Azərbaycanı günahlandırır. Bu problemlərdə Azərbaycanın rolu olduğunu iddia edir”.
Politoloq yeni prezidentin 2 dövlət arasında gedən münasibətlərdən öncə seçkiqabağı platformasında verdiyi sözlərə əməl etməli olduğunu vurğuladı: “İrana yeni təyin edilmiş prezident Həsən Ruhani seçilməzdən öncə bir sıra öhdəliklər verib. Ölkələr arasında münasibətdən öncə o, seçkiqabağı platformasında verdiyi vədləri həyata keçirməlidir. Həsən Ruhani hələ ki şərti, islahatçı prezident sayılır. Ölkələr arasında münasibət haqqında birmənalı fikir səsləndirmək üçün hələ çox tezdir”.
Qeyd edək ki, H.Ruhani mətbuat konfransında seçkiqabağı kampaniya zamanı verdiyi sözlərin heç birini unutmadığını deyib.
Fatimə İbrahimova
