"Azərbaycanla İran arasında münasibətlərin kökünə baxsaq, görərik ki, hələ Birinci Qarabağ müharibəsi zamanı da İran Ermənistanın yanında dayanmışdı”.
Bu sözləri AZXEBER.COM-a açıqlamasında Milli Məclisin deputatı Razi Nurullayev deyib. O, bildirib ki, uzun illər birgə tariximiz olan İran Azərbaycanın mövqeyini müdafiə etmədi:
"Azərbaycan İranla münasibətlərin gərginləşməsində heç zaman maraqlı olmayıb, bu gün də maraqlı deyil. İranın Azərbaycana qarşı irəli sürdüyü ittihamların da heç bir əsası olmadığına görə onlar Azərbaycan cəmiyyəti və höküməti tərəfindən təpki ilə üzləşdi. Bu gün İran Azərbaycanı belə ittiham edir ki, guya biz bəzi məsələrdə İsraildən istifadə edirik, guya İsrail qoşunları Azərbaycandadır və s. Amma heç bir fakt, sübut ortaya qoya bilmirlər. Əgər İran bu gün bu ittihamlarla çıxış edirsə, müəyyən mənada bunu əsaslandırmaq da istəyir, amma Azərbaycanla İran arasında münasibətlərin kökünə baxsaq, görərik ki, hələ Birinci Qarabağ müharibəsi zamanı da İran Ermənistanın yanında dayanmışdı. Din, əqidə qardaşımız adlandırılan, qonşumuz olan, uzun illər birgə tariximiz olan İran İslam Respublikası Azərbaycanın birmənalı müdafiəsinə getmədi.
Deputat deyib ki, İran məscidlərdə donuz saxlayan Ermənistanı müdafiə edir:
"Bütün bunlara rəğmən dini məscidlərdə donuz saxlayan, dini inancları təhqir edən bir dövlətə qardaş deyə müraciət etdi və bu gün də bu cür müraciət edir. Bu, təbii ki, Azərbaycan cəmiyyətini narahat edir. Bu gün bizə İsrail adı ilə ittiham irəli sürürsə, Birinci Qarabağ müharibəsi zamanı heç İsrail adı hallanmırdı, o zaman İran hansı ittihmla Azərbaycanı müdafiə etmədi. Nəyə görə Ermənistanın yanında dayandı, niyə Azərbaycana qarşı ikili standart ortaya qoydu? İran bu suallara cavab versə, bugünkü məsələlərin bir çoxuna aydınlıq gələr”.
Deputatın sözlərinə görə, hazırki məsələlərdə qazanan tərəf Azərbaycandır:
"Burada iki incə məqam da var, birincisi ondan ibarətdir ki, İran Azərbaycana qarşı bu cür iddialar irəli sürməklə Azərbaycanı zəiflədə, təkləyə bilməz. Çünki bütün dünya bu məsələdə Azərbaycanı müdafiə edir. İran Ermənistandan başqa bir dövlət tapa bilməz ki, onu Azərbaycana qarşı istifadə edə bilsin. İkinci incə məqam ondan ibarətdir ki, Ermənistan hazırda bu iddialarda birmənalı olaraq, açıq sözlə İran tərəfini müdafiə edir. Bu isə Ermənistanı dünya dövlətlərinin, Avropa dövlətlərinin, İsrailin, ABŞ-ın gözündən salır. Bu cəhətdən də Azərbaycan üstünlük dərəcəsinə malik olmuş olur. Yəni Ermənistan çox iyrənc bir oyunun içərisindədir. Bu oyun da Ermənistanı gözdən salmağa xidmət edir. Biz İranla gərginliyin olmasını istəməsək də, hazırki məsələlərdə qazanan tərəf Azərbaycan, uduzsan isə digər tərəflərdir”.
Aydın Nuri
