İranın Milli Təhlükəsizlik Ali Şurası Tehranla Beynəlxalq Atom Enerjisi Agentliyi (BAEA) arasında imzalanmış yeni əməkdaşlıq sazişini təsdiqləyib.
Bu barədə İranın Milli Təhlükəsizlik Ali Şurasının katibliyi məlumat yayıb.
Qeyd edilib ki, sənədin bəndləri nəzərdən keçirilib və əsasən təsdiq olunub.
Xatırladaq ki, 25 iyunda İran parlamenti ölkənin BAEA ilə əməkdaşlığının dayandırılmasına dair qanun layihəsini qəbul etmiş, 2 iyulda isə Prezident Məsud Pezeşkiyan sənədi imzalamışdı. Xarici işlər naziri Abbas Araqçi həmin vaxt bildirmişdi ki, qanun qarşılıqlı təmasların tamamilə bloklanmasına səbəb olmur.
Qeyd edək ki, sentyabrın 9-da Qahirədə BAEA Baş direktoru Rafael Qrossi və Abbas Araqçi İran və BAEA arasında əməkdaşlığın bərpası barədə yeni saziş imzalayıb. Abbas Araqçi bildirib ki, yeni razılaşma hər iki tərəfin tələblərinə cavab verir, lakin İrana qarşı hər hansı düşmənçilik addımı atılacağı təqdirdə bütün əlaqələr dərhal kəsiləcək.
///apa
