İran və Qətər arasında dəniz ticarəti təxminən beş aylıq fasilədən sonra bərpa edilib.
AZXEBER.COM-un "Reuters"ə istinadən məlumatına görə, bu barədə İran mediasına bu ölkənin Dohadakı ticarət attaşesi Abbas Əbdülxani bildirib.
Qeyd edilib ki, Fars körfəzindən keçən ən qısa kommersiya dəniz yolu olan İranın Deyyer limanı ilə Qətərin Ər-Ruvays limanı arasında gəmiçilik, İranın Dohadakı səfirliyi və Qətər hakimiyyəti arasında əlaqələndirmədən sonra bərpa olunub. Bundan əvvəl İran, ABŞ və İsrail arasındakı döyüş əməliyyatları zamanı Deyyer limanı dəfələrlə zərbələrə məruz qalmışdı.
Agentliyin məlumatına görə, üzbəüz yerləşən iki liman əsasən regional ticarətə xidmət edir.
İyunun sonunda İranın Ticarətin İnkişafına Yardım Təşkilatında, Fars körfəzinin cənubundakı ən mühüm limanlardan biri olan Cəbəl-Əli limanı vasitəsilə İran və BƏƏ arasında ticarət əlaqələrinin bərpa olunması barədə məlumat verilmişdi. Bu, İran və ABŞ arasında atəşkəsi nəzərdə tutan anlaşma memorandumunun imzalanmasından sonra regionda ticarətin tədricən bərpa olunmasına işarə edir.
Bu gün Qətərin Nəqliyyat Nazirliyində dəniz daşımalarının tam həcmdə bərpa olunması barədə məlumat verilib.
