İranın xarici işlər naziri Abbas Arakçi ABŞ Prezidenti Donald Trampa müraciət edərək Hörmüz boğazı ilə bağlı "daha böyük yanlış hesablamaya” yol verməməyə çağırıb.
AZXEBER.COM xarici mətbuata istinadən xəbər verir ki, Arakçi "X” hesabında paylaşdığı açıqlamada ABŞ-ın kəşfiyyat səhvləri səbəbindən uzun müddətdir yanlış hesablamalar etdiyini bildirib.
"Saxta xəbərlərdən daha pis olan saxta kəşfiyyat məlumatlarıdır. Diqqətli olun”, – Arakçi qeyd edib.
İranlı nazir ABŞ prezidentinin İranla bağlı son açıqlamalarına da münasibət bildirib. O, Trampın Hörmüz boğazına nəzarətin ABŞ-da olduğunu və bunun davam etdiriləcəyini bildirməsinə cavab olaraq "Allah böyükdür, yer üzündəki istənilən gücdən daha böyükdür. Biz Allaha güvənirik” ifadələrini işlədib.
Qeyd edək ki, Donald Tramp əvvəlki paylaşımında ABŞ-ın Hörmüz boğazına tam nəzarət etdiyini iddia edib. O, İranın hərbi imkanlarının zəiflədiyini və ölkənin ABŞ tərəfindən vurulduğunu bildirib.
Tramp paylaşımının sonunda İranın artıq Yaxın Şərqin "zorbası” olmadığını deyərək "Allaha şükürlər olsun” ifadəsini işlədib.
Gülay
