İraqın antiterror xüsusi xidmət orqanları tərəfindən ölkənin şimal-şərqində yerləşən Hamrin dağlarında keçirilən əməliyyat zamanı 60 İŞİD terrorçusu zərərsizləşdirilib.
AZXEBER.COM "Qafqazinfo”-ya istinadən xəbər verir ki, bu barədə İraq Silahlı Qüvvələri Baş komandanının mətbuat katibi Yəhya Rəsul məlumat verib.
Martın 9-dan bəri iki həftədir ölkənin şimalındakı dağlıq Mahmur bölgəsində terrorçulara qarşı əməliyyat keçirilib və bu müddət ərzində silahlıların istifadə etdiyi 120 mağara və digər obyektlər məhv edilib, 27 terrorçu zərərsizləşdirilib.
Mətbuat katibinin sözlərinə görə, Mahmur bölgəsindəki xüsusi əməliyyatlar nəticəsində silahlılar Hamrin dağlarına köçüb. Terrorla mübarizə rəsmiləri hərəkətlərini izləyib, yeni silahlı sığınacaqlar tapıb və məlumatları Hava Qüvvələrinə ötürüb. Martın 25-i isə həmin mövqelərə İraq HHQ tərəfindən zərbələr endirilib.
"Bu gün, 7 aprel 2021-ci il tarixində məhz bu zərbələr nəticəsində 60 terrorçunun məhv edildiyini təsdiqləyirik”,- deyə açıqlamada əlavə olunub.
