"Vahid namizəd Azərbaycanda olmalıdır"

“Milli Şuranın vahid namizədi olacaq şəxs vahid namizədliyi ilə bağlı iddiasını ortaya qoymalıdır. Namizəd olmayan şəxs nə cür vahid namizəd ola bilər? Bugünkü məsuliyyəti, ağırlığı boynuna götürməyən şəxs nə cür bizim yekdil namizədimiz ola bilər?”

APA-nın məlumatına görə, bunu Müsavat Partiyasının başqanı İsa Qəmbər İctimai Palatanın sessiyasındakı çıxışı zamanı Milli Şuranın vahid namizədi ilə bağlı məsələyə münasibət bildirərkən deyib.

İsa Qəmbər bildirib ki, Milli Şura haqqında müxtəlif söz-söhbətlər var. Onun sözlərinə görə, Milli Şurada təmsil olunanlar onun Azərbaycanın layihəsi olmasını təmin etməlidirlər: “Milli Şuranı müxtəlif tərəfə çəkənlər, müxtəlif ad verənlər var. Amma orada biz varıq. Biz Milli Şuranın məhz Azərbaycanın proyekti olmasını, Azərbaycanın maraqlarına xidmət etməsini təmin etməliyik. Milli Şuranın qəbul etdiyi qərarları kiminsə xoşuna gəldiyi üçün deyil, Azərbaycan xalqının maraqlarına cavab verdiyi üçün qəbul etməliyik. İstəyirəm ki, bu aydın həqiqəti hamımız bir yerdə qəbul edək və Milli Şuranın Azərbaycanın maraqlarına xidmət etməsi ilə bağlı narahatlıqları təbii qəbul edək. Eyni zamanda bu narahatlıqları aradan qaldıran addımlar ataq”.