Fərid Şahbazlı: “Cənab Prezident İlham Əliyev Azərbaycan gəncliyinin ən böyük dostu və himayədarıdır”
Bu gün 2006-cı ildə “Gənc Liderlər” Uşaq Təşkilatı kimi fəaliyyətə başlayan, 2011-ci ildən etibarən “İslahatçı Gənclər” İctimai Birliyi adı altında dövlət qeydiyyatına alınmış formada çalışan gənclər birliyinin 8 yaşı tamam olur.Birliyin ad günü ilə bağlı fikirlərini bölüşən İB sədri Fərid Şahbazlı söyləyib ki, məktəbli ikən çox böyük ümidlərlə yaratdıqları bu təşkilat hazırda ölkəmizin ən iddialı və strukturlaşmış təşkilatlarından biridir:
“Biz bu illər ərzində 600-dən yaxın müxtəlif istiqamətli layihə və tədbirlər reallaşdırıb, gənclər sektorunda özümüzə məxsus yer tuta bilmişik. Hazırda birliyimizin üç bölgədə, yeddi universitetdə təmsilçilikləri fəaliyyət göstərir. Fəaliyyətimiz boyu kəmiyyətə deyil, keyfiyyətə üstünlük verdiyimizdən, təşkilatın sıralarında ölkəmizin yüzlərlə intellektual və dövlətçiliyə bağlı gənci birləşib. 8 il ərzində ölkəmizin 28 rayonunda, dünyanın 6 ölkəsində müxtəlif tədbirlər təşkil edib, çoxsaylı konfranslarda iştirak etmişik. “İslahatçı Gənclər” İctimai Birliyi eyni zamanda ölkə mediasının da ən çox diqqət göstərdiyini təşkilatlardandır. Hesab edirəm ki, 8 illik fəaliyyətimiz cəmiyyətin müxtəlif təbəqələri tərəfindən çox böyük etimad və diqqətlə qarşılanır. Təsadüfi deyil ki, bu gün onlarla millət vəkili, dövlət məmurları, ziyalılar təşkilatımızın Fəxri üzvləri sırasında cəmləşib. Biz bu illər ərzində birliyimizə dəstəyini əsirgəməyən hər kəsə çox minnətdarıq”.
Fərid Şahbazlının sözlərinə görə, onlar bütün fəaliyyətləri boyu daim dövlətçilik mövqeyindən çıxış edib və ölkə prezidenti İlham Əliyevin siyasi xəttini müdafiə ediblər: “Yolumuz və məqsədimiz aydındır. Cənab Prezident Azərbaycan gəncliyinin ən böyük dostu və himayədarıdır. Azərbaycan gəncliyi dövlətimizin inkişafını yalnız Ulu Öndər Heydər Əliyevin ideyalarında və Cənab Prezident İlham Əliyevin reallaşdırdığı alternativi olmayan siyasi kursda görür”.
