İsrailin müdafiə naziri Yoav Qalant bildirib ki, girovlarla bağlı razılaşma əldə olunmasa, ölkə çox cəbhəli müharibə təhlükəsi ilə üzləşə bilər.
AZXEBER.COM xəbər verir ki, bu barədə İsrailin 12-ci telekanalı məlumat yayıb.
Məlumata görə, Qalant bunu hərbi kabinetin iclasında bildirib və müvafiq sənəddə qeyd edib. Hərbi rəhbərliyin nöqteyi-nəzərindən sövdələşmənin bağlanması təkcə girovların qaytarılmasına imkan verməyəcək, həm də şiə Hizbullah hərəkatı ilə qarşıdurma səbəbindən Livanla sərhəddə gərginliyi azalda bilər. Eyni zamanda, sənəddə deyilir ki, razılığın əldə edilməməsi «vəziyyətin dərhal pisləşməsi, bir neçə cəbhədə müharibə vəziyyətinə düşməsi» təhlükəsi yaradacaq.
Kanalın açıqlamasında bildirilib ki, sənəd baş nazir Benyamin Netanyahuya və yüksək rütbəli məmurların dar bir dairəsinə nümayiş etdirilib. Orada İsrailin «strateji yol ayrıcında» olduğu və seçim etməli olduğu deyilir.
Xatırladaq ki, Fələstinin HƏMAS hərəkatının yaraqlılarının 2023-cü il oktyabrın 7-də Qəzza zolağından İsrail ərazisinə soxulması, sərhədyanı qəsəbələrin sakinlərinin öldürülməsi və 250 nəfərin girov götürülməsindən sonra Yaxın Şərqdə vəziyyət kəskin şəkildə pisləşib. İsrail Qəzza zolağının tam mühasirəyə alındığını elan edib, bundan sonra HƏMAS-ı məhv etmək və girovları azad etmək üçün Fələstin anklavında quru əməliyyatına başlayıb. İsrail tərəfinin son məlumatına görə, radikallar Qəzzada hələ də 100-dən çox insanı girov saxlayır.
