Bu gün İsrail Müdafiə Qüvvələri Qəzza zolağından İsrail ərazisinə atılan raketi hava hücumundan müdafiə sistemləri ilə zərərsizləşdirib.
APA xəbər verir ki, bu barədə İsrail Ordusunun mətbuat xidməti məlumat yayıb.
Məlumata görə, hadisə nəticəsində xəsarət alan olmayıb.
Eyni gün İsrail Hərbi Hava Qüvvələri Qəzza şəhərində yerləşən Al-Ahli Ərəb Xəstəxanasına hava hücumu həyata keçirib. Hücum nəticəsində xəstəxananın təcili yardım və qəbul şöbələri dağıdılıb, digər bölmələrə ciddi ziyan dəyib. Xəstəxana rəhbərliyi və şahidlərin məlumatına görə, hücumdan əvvəl özünü İsrail təhlükəsizlik qüvvələrinin nümayəndəsi kimi təqdim edən şəxs tərəfindən xəstəxanaya xəbərdarlıq zəngi edilib.
İsrail ordusu bəyan edib ki, bu hücum xəstəxana binasında yerləşən HƏMAS-a məxsus komanda və nəzarət mərkəzini hədəf alıb. Lakin bu iddia ilə bağlı müstəqil təsdiq yoxdur.
Qəzza Səhiyyə Nazirliyinin məlumatına görə, 2023-cü ilin oktyabr ayından bəri İsrailin hücumları nəticəsində Qəzza zolağında 50,900-dən çox fələstinli həlak olub.
