İsrail qüvvələri İordan çayının qərb sahilində yerləşən xəstəxanaya hücum edib.
AZXEBER.COM xarici mətbuata istinadən xəbər verir ki, işğal altındakı İordan çayının qərb sahilində xəstəxanaya basqın edən İsrail qüvvələri biri müalicə olunan 3 fələstinlini öldürüb.
Fələstinin Səhiyyə naziri Mey əl-Kayle Birləşmiş Millətlər Təşkilatına, beynəlxalq və insan haqları təşkilatlarına etdiyi çağırışda İsrail qüvvələrinin Qəzza zolağı və işğal altındakı İordan çayının qərb sahilində Fələstin xalqına və səhiyyə müəssisələrinə qarşı törətdiyi cinayətlərə son qoyulmasını istəyib.
Bildirilib ki, mülki geyimli, həkim və tibb bacısı geyimində olan 10-a yaxın İsrail xüsusi təyinatlısı xəstəxanaya daxil olaraq 3-cü mərtəbəyə qalxaraq susdurulmuş silahlarla 3 fələstinlini qətlə yetiriblər. İsrail ordusu öldürdüyü fələstinlilərin HƏMAS üzvü olduğunu iddia edib.
Xatırladaq ki, 2023-cü il oktyabrın 7-dən etibarən işğal altındakı İordan çayının qərb sahili və Şərqi Qüdsdə İsrail qüvvələrinin və qeyri-qanuni yəhudi məskunlaşanların hücumları nəticəsində həlak olan fələstinlilərin sayı 381-ə yüksəlib.
Mikayıl
