İsrail ordusu Hizbullaha qarşı Livanda quru əməliyyatlarına başlayıb. Bu barədə İsrail Müdafiə Qüvvələri məlumat yayıb.
Məlumata görə, İsrail Müdafiə Qüvvələri Livanın cənubunda Hizbullaha qarşı məhdud quru əməliyyatlarına başlayıb. İsrail Müdafiə Qüvvələri qoşunların əraziyə yeridilməsindən əvvəl "təhdidləri aradan qaldırmaq” üçün kütləvi hava hücumları və artilleriya atəşi həyata keçirdiyini bildirib.
Politoloq Aytən Qurbanova AZXEBER.COM-a açıqlamasında deyib ki, İsrailin quru əməliyyatlara başlaması Orta Şərqdə davam edən hərbi-siyasi qarşıdurmanın yeni mərhələyə keçdiyini göstərir:
"İsrail ordusunun Livan ərazisində quru əməliyyatlarına başlaması Orta Şərqdə davam edən hərbi-siyasi qarşıdurmanın yeni və daha mürəkkəb mərhələyə keçdiyini göstərir. Hərbi əməliyyatların yalnız hava zərbələri ilə məhdudlaşmaması və quru qüvvələrinin də prosesə cəlb olunması münaqişənin intensivliyinin artdığını və tərəflər arasında birbaşa toqquşma riskinin də yüksəldiyini nümayiş etdirir. Bu addım isə öz növbəsində həm hərbi taktika, həm də regional təhlükəsizlik nöqteyi-nəzərindən bir sıra mühüm nəticələr yarada bilər. İlk növbədə onu qeyd etmək lazımdır ki, quru əməliyyatlarının başlanması münaqişənin coğrafiyasını genişləndirə və qarşıdurmanı daha uzunmüddətli fazaya keçirə bilər”.
Politoloq qeyd edib ki, İsrailin əsas məqsədi Livan ərazisində fəaliyyət göstərən silahlı qrupların hərbi infrastrukturlarını zəiflətməkdir:
"İsrailin əsas məqsədi Livan ərazisində fəaliyyət göstərən silahlı qrupların hərbi infrastrukturlarını zəiflətmək və sərhəd bölgələrində təhlükəsizlik zonası yaratmaqdır. Lakin Livanın mürəkkəb coğrafiyası, qeyri-dövlət silahlı aktorların geniş şəbəkəsi və asimmetrik müharibə taktikasından istifadə imkanları quru əməliyyatlarının sürətli nəticə verməsini çətinləşdirə bilər. Bu isə əməliyyatların uzanması və itkilərin artması ehtimalını yüksəldir. Digər tərəfdən isə ən vacib məqam regional eskalasiya riskinin artması ilə bağlıdır. Livan ərazisində genişmiqyaslı quru əməliyyatlarının aparılması yalnız iki tərəf arasında hərbi qarşıdurma kimi qalmaya bilər. Orta Şərqdə mövcud olan mürəkkəb münasibətlər sistemi və müxtəlif aktorların prosesə dolayı təsir imkanları münaqişənin daha geniş regional çərçivəyə yayılması ehtimalını artırır. Belə bir ssenari regionda təhlükəsizlik balansını ciddi şəkildə dəyişə və beynəlxalq aktorların prosesə daha fəal müdaxiləsinə səbəb ola bilər”.
Ekspert vurğulayıb ki, quru əməliyyatları siyasi-diplomatik müstəvidə də yeni dinamika yarada bilər:
"Quru əməliyyatları siyasi-diplomatik müstəvidə də yeni dinamika yarada bilər. Tarixi təcrübə göstərir ki, münaqişələrdə hərbi eskalasiyanın artması müəyyən mərhələdə beynəlxalq vasitəçilik təşəbbüslərini də sürətləndirir. Çünki uzunmüddətli və genişmiqyaslı müharibə həm regional sabitlik, həm də qlobal enerji və təhlükəsizlik sistemləri üçün ciddi risklər yaradır. Məhz bu nöqteyi-nəzərdən yanaşdıqda, beynəlxalq təşkilatlar və böyük güclər tərəfindən atəşkəs və diplomatik həll variantlarının gündəmə gətirilməsi ehtimalı da artır. Nəticə etibarilə, İsrailin Livanda quru əməliyyatlarına başlaması münaqişənin xarakterini dəyişə biləcək strateji addım kimi dəyərləndirilə bilər. Bu qərar qısamüddətli hərbi üstünlük əldə etmək məqsədi daşısa da, eyni zamanda münaqişənin dərinləşməsi, regional eskalasiya və uzunmüddətli qeyri-sabitlik risklərini də artırır. Ona görə də, qarşıdakı dövrdə həm hərbi əməliyyatların gedişatı, həm də diplomatik təşəbbüslərin intensivliyi Orta Şərqdə təhlükəsizlik mühitinin formalaşmasında həlledici rol oynayacaq”.
Şahanə Ziyad
