İsraillə HƏMAS arasında əldə edilən əsir mübadiləsi razılaşmasının təfərrüatları mətbuata əks olunan xəbərlərlə yanaşı rəsmi açıqlamalarla da üzə çıxmağa başlayıb.
AZXEBER.COM xarici mediaya istinadən xəbər verir ki, İsrail və HƏMAS Qətər və Misirin vasitəçiliyi ilə əsir mübadiləsi barədə razılığa gəlib.
Təl-Əviv rəhbərliyi dünən axşam baş nazir Binyamin Netanyahunun rəhbərliyi ilə keçirilən və təxminən 6 saat davam edən kabinet iclasından sonra verdiyi açıqlamada əsir mübadiləsi razılaşmasını qəbul etdiyini açıqlayıb.
Nazirlər Kabinetinin iclasından sonra Baş Nazirliyin Mətbuat İdarəsindən verilən açıqlamada İsrailin HƏMAS ilə əsir mübadiləsi razılaşmasını və hərbi əməliyyatlarda 4 günlük humanitar fasiləni qəbul etdiyi açıqlanıb.
Açıqlamada "4 gün ərzində qadın və uşaqların da olduğu ən azı 50 girovun azad edilməsi və bu müddət ərzində hərbi əməliyyatların dayandırılması nəzərdə tutulur",- deyə bildirilib.
Açıqlamada hər 10 əsir azad edilməsi müqabilində hərbi əməliyyatların əlavə bir gün müddətinə dayandırılacağı ifadə edilərək, İsrail hökuməti və ordusunun bütün əsirləri geri qaytarmaq üçün müharibəni davam etdirəcəkləri, hərbi əməliyyatları tamamlayacaqları vurğulanıb.
Həmas İsraillə əldə olunan razılaşma çərçivəsində qarşıdurmalarda 4 günlük humanitar fasilə veriləcəyini və bu müddət ərzində İsrail həbsxanalarında olan 150 fələstinli əsirin 50 israilli əsirin azadlığa buraxılması qarşılığında azad ediləcəyini açıqlayıb.
Bəyanatda humanitar fasilənin qüvvədə olacağı 4 gün ərzində Qəzza zolağına humanitar yardım materialları və yanacaq daşıyan yüzlərlə yük maşınının daxil olacağı, yanacaq və yardım materiallarının Qəzza zolağının hər bölgəsinə daşınacağı bildirilib.
Bəyanatda Qəzza zolağında şimaldan cənuba Səlahəddin yolu boyunca insanların hərəkət azadlığının təmin ediləcəyi də vurğulanıb.
Ayşən
