Sentyabrın 18-də Bakıda İsrail və Suriya nümayəndələri arasında görüş keçiriləcək. Görüşün əsas mövzusu iki ölkə arasında münasibətlərin normallaşdırılması və regional təhlükəsizlik məsələləri olacaq.
Milli Məclisin deputatı Musa Quliyev AZXEBER.COM-a açıqlamasında bildirib ki, İsrail və Suriya arasında danışıqların məhz Bakıda keçirilməsi Azərbaycanın artıq regional və beynəlxalq səviyyədə böyük nüfuza malik olduğunu göstərir:
"Bu, Azərbaycanın beynəlxalq oyunçu kimi sülh yaradan, barışdırıcı və diplomatik münasibətləri bərpa edən rolda çıxış etməsinin bariz nümunəsidir. Qeyd edim ki, İsraillə Suriya arasında münasibətlər həmişə gərgin olub. İsrail dövlətinin yaranmasından bu yana Suriya onu dövlət kimi tanımayıb. İki ölkə arasında diplomatik, iqtisadi və humanitar əlaqələr mövcud olmayıb. Yalnız bu ilin iyulunda Bakıda onların nümayəndələrinin ilk görüşü baş tutub. Bu, Azərbaycan Respublikasının və Prezidentinin təşəbbüsü ilə bölgədə sülh yaratmaq missiyasının inkişafının göstəricisidir”.
Deputat deyib ki, ikinci görüşdə əldə edilən istənilən razılaşma uğur hesab olunacaq:
"Bu razılaşmalar humanitar və mədəni əlaqələrin bərpası, iqtisadi münasibətlərin qurulması, ən əsası isə düşmənçiliyin aradan qaldırılması baxımından mühüm əhəmiyyət kəsb edir. Belə görüşlərin məhz Bakıda keçirilməsi, Azərbaycanın vasitəçi rolunda çıxış etməsi ölkəmizin bölgədə böyük nüfuza malik olduğunu bir daha sübut edir. Bununla yanaşı, Suriya ilə Azərbaycan arasındakı münasibətlər də getdikcə yaxşılaşır. Bəşər Əsədin hakimiyyəti dövründə iki ölkə münasibətləri yaxşı deyildi. Hətta düşmənçilik səviyyəsində idi. Həmin vaxt Suriya hökuməti Ermənistanı dəstəkləyirdi. İndiki hökumət isə Azərbaycanla dost münasibətlər qurmağa təşəbbüs göstərir və buna cəhd edir”.
Parlamentari qeyd edib ki, Azərbaycan İsrailin bölgədəki islam dövlətləri arasında ən etibarlı tərəfdaşıdır:
"İsrail də daim Azərbaycanı dəstəkləyib – istər Qarabağ müharibəsi, istərsə də torpaqlar işğal altında olduğu dövrdə Qarabağın Azərbaycan torpağı olduğunu açıq şəkildə ifadə edib. Bu baxımdan, Azərbaycanın İsraillə yaxşı münasibətlərə malik olması digər müsəlman dövlətləri ilə də mövcud konfliktlərin dialoq və danışıqlar yolu ilə ədalətli şəkildə həllinə töhfə verə bilər. Beləliklə, Suriya-İsrail danışıqlarının Bakıda keçirilməsi müsbət addım kimi qiymətləndirilir”.
Şahanə Ziyad
