Demokratik Qüvvələrin Milli Şurasının növbəti sessiyası iyulun 2-si saat 11-də Müsavat Partiyasının mərkəzi qərargahında başlayacaq.

AZXEBER.COM-un məlumatına görə, məlumatı “Media forum” saytına şura üzvü, EL hərəkatının sədr müavini Eldəniz Quliyev verib. Eldəniz Quliyev sessiyada vahid namizəd məsələsinin həll olunmasının gözlənildiyini söyləyib:

“Vahid namizəd məsələsi toplantının gündəliyinə salınacaq. Arzu olunur ki, sabah sessiyada bu məsələ həll edilsin. Seçkiyə az qalır, biz gecikirik”.

Məsələylə bağlı AZXEBER.COM-a danışan Vətəndaş İnkişaf Partiyasının (VİP) sədri Əli Əliyev “Milli Şura”nın keçirdiyi hansısa bir iclasın hakimiyyət üçün heç bir qorxuya səbəb olmadığını söyləyib:

“Sirr deyil ki, “Milli Şura” konkret olaraq Moskvanın layihəsidir. Buna görə də namizədin kim olmasının heç bir fərqi yoxdur. Onların keçirdiyi heç bir sessiya bizim üçün təhlükəli ola bilməz və bizi narahat etmir”.

Partiya sədrinin sözlərinə görə, vahid namizədin adı artıq şura üzvlərinin hamısına bəllidir. Onlar sadəcə olaraq ictimai rəyi analiz etməyə çalışırlar:

“Vahid namizədin təyin edilməsində bir az vaxt uzandı. Amma mən düşünürəm ki, vahid namizədin adı açıqlanmasa da Şura üzvləri öz aralarında onu təyin ediblər. Vahid namizədin Rüstəm İbrahimbəyov olmasına gəlincə isə deyə bilərəm ki, o siyasi fəaliyyətə başladığı zamandan siyasətçiyə yaraşmayan hərəkətlər edir. Bütün bunlar onun siyasi savadsızlığından yox, ümumiyyətlə savadsızlığından irəli gəlir. Bir daha deyə bilərəm ki, namizədin kimliyi önəmli deyil, çünki istənilən namizəd Kremlin maraqlarına işləyəcək”.

Fatimə İbrahimova