Layihənin ideya müəllifi, millət vəkili Jalə Əliyeva festivalla bağlı AZXEBER.COM-a eksklüziv müsahibə verib.
- Vətənpərvərlik mövzusunda gənclərin 1-ci Ümumrespublika Teatr Festivalı keçirmək ideyası necə yarandı?
- Bildiyiniz kimi, bu gün Azərbaycanın ən böyük problemi Dağlıq Qarabağ problemidir. Biz bu məsələdə bir olmalıyıq. Vətənpərvərlik mövzusunda gənclərin 1-ci Ümumrespublika Teatr Festivalının keçirilməsi xalqımız üçün çox əhəmiyyətlidir. Gənclərdə vətənpərvərlik hissini daha da artırmaq, onların vətənə, xalqa layiqli övlad olmaları üçün hər birimiz çalışmalıyıq. Hər bir Azərbaycan vətəndaşı, Azərbaycan gənci prezidentimizin ətrafında sıx birləşməlildir. Bu teatr festivalı da məhz buna istiqamətlənib. Biz dəfələrlə qeyd etmişik ki, bu teatr festivalında əsas qalib olmaq deyil, əsas iştirakdır. Çünki bu festival Vətənə olan hisslərimizin, məhəbbətimizin göstəricisidir. Vətənini sevən hər bir kəs bu festivala qatıla bilər. Təsadüfi deyil ki, festival Azərbaycanın Milli Qəhrəmanı Mübariz İbrahimovun əziz xatirəsinə həsr olunur. Mübariz xalqımızın böyük oğludur. O, hər bir Azərbaycan gəncinə nümunədir.
- Layihə neçə mərhələdən ibarət olacaq?
- Layihə üç mərhələdə keçiriləcək. Avqustun sonunadək davam edəcək birinci mərhələ vətənpərvərlik mövzusunda yazılan ssenarilərin və bu ssenariləri teatrlaşdıracaq yaradıcı kollektivin qəbuludur. Sentyabrdan başlayacaq ikinci mərhələdə isə təsdiq olunan ssenarilər və yaradıcı qruplar festivalda iştirak etmək hüququ qazanacaqlar. Sonda Bakıdakı teatrların birində festival keçiriləcək və festivaldan sonra qaliblərin adları elan ediləcək. Bu layihə Azərbaycan Müstəqilliyini bərpa etməsinin 20-ci ildönümü ilə bağlıdır. Layihə məhz o ərəfədə yekunlaşacaq.
- Sonda AZXEBER.COM oxucularına nə demək istərdiz?
- Sonda bir daha bizə dəstək olan hər bir kəsə minnətdaram. Xüsusən, Mədəniyyət və Turizm Nazirliyinə, Gənclər və İdman Nazirliyinə. Əminəm ki, layihənin sonunda layiq olan kollektiv qalib olacaq. Bir daha qeyd edirəm ki, layihədə əsas iştirakdır. Gənclərə də demək istəyirəm ki, bir az aktiv olsunlar və festivala qatılsınlar.
Hacıbəy HEYDƏRLİ
