Dünyada tüğyan edən COVİD-19 pandemiyası ilə bağlı ölkədə 2 günlük sərt karantin rejimi tətbiq olunub. Bu günlər ərzində Azərbaycan polisi də səfərbər olub. Təəssüf ki, bu 2 gün ərzində polisin qanuni tələbinə riayət etməyən vətəndaşlar da olub.
Virusdan danışırsan, deyirlər boş şeydi. Polisin gördüyü işlərdən paylaşım edirsən, deyirlər əşiii quramadı, şoudu. Dövlət təhlükəsizliyindən söz açmaq istəyirsən, qışqırırlar ki, hanı dövlət, niyə hüquqlarımı qorumur? Gəlib çatmışıq zurnanın məlum səs çıxartdığı nöqtəyə.
Birmənalı şəkildə deyə bilərəm ki, Azərbaycan polisi pandemiyanın ilk günündən bu günə qədər vətəndaşlara hörmətlə yanaşıb. Bu müddətdə bir məqam xüsusi diqqətimi cəlb edib. Polis milli-mənəvi dəyərlərimizi qoruyaraq xanımlara qarşı xüsusi həssaslıq göstərib. Onlara ciddi qayda pozmadıqda yalnız xəbərdarlıq edilib, cərimələnən xanımların fotosu isə 99 faiz halda ictimailəşdirilməliyib. Bu çox incə məqamdır.
Bundan başqa istər postlarda, istərsə də küçələrdə xidmət göstərən polis əməkdaşları vətəndaşlarla çox mədəni, nazik rəftar edirdilər.
Son 2 gündə də polislərin vətəndaşlara dəstəyi ilə bağlı insanlardan təkcə bizə 100-ə yaxın video göndərilib, vaxt qıtlığı olduğu üçün hamısını paylaşa bilməmişik. Əgər bu videoların səmimiliyinə inanmayan varsa, təsadüfi çəkildiyini sübut edə bilərəm.
Bütün bunların fonunda son günlər dünyanın supergüc dövlətlərində baş verənlərdən həvəslənən bəzi qüvvələr polisimizlə vətəndaşlarımızı üz-üzə qoymağa çalışır. Ancaq əminəm ki, insanlar ağı qaradan seçə bilir və pandemiya dövründə həkimlər qədər polislərin də rolunu yüksək qiymətləndirir.
Sfera.az saytının baş redaktoru Ozal Məmmədov da polisin fəaliyyətinə yüksək qiymət verib:
İki gündür baş verənləri izləyib, səssiz qala bilmərəm. Bir anlıq düşünün ki, ailə üzvünüz ağır xəstədir. Təcili yardım çağırmısınız. Məhlədə bir cavan oğlan da təcili yardıma yol vermək əvəzinə siqaret çəkir və təcili yardıma mane olur. Bu anda təcili yardımdakı həkimlər maşından düşüb o cavanı yoldan çəkmək istəyir. Bu anda qonşunuzun biri qışqırır ki, gəlin əlimizdəki zibilləri həkimlərin başına ataq və atırlar. Həkimlərin və Sizin başınız qarışır bu hay-küyə və təcili yardımdakı xəstəniz ölür. Bundan sonra şəxsən Sizin və qohumlarınızın təcili yardıma yol verməyən cavan oğlana və həkimlərin başına zibil atan qonşularınıza cavabınız nə olacaq? Xəstənizi öldürən qonşularınızı qınayacaqsınız, yoxsa əzizinizi müdafiə edən həkimləri? Bəlkə siqaret çəkən cavan oğlana haqq qazandıracaqsınız?
Keçirəm mətləbə. Polislər robot deyil. Onlar da şuuru və ürəyi olan bizim kimi insanlardır. Bu günlərdə polisin çiyninə ağır yük düşüb. Həm polis, həm də həkim olmağa məcbur qalıblar. Polisin də ailəsi, uşağı yaşlı ata-anası var. Polisin də qohumları arasında bu virusu tutanlar, hətta bundan ölənlər var. Amma polis bu günlərdə bizi tək cinayətkardan yox, həm də özümüzdən qorumağa çalışır. Çünki bu dəfə elə bir bəlaya düşmüşük ki, özümüz özümüzə elədiyini cinayətkar edə bilmir. Rəsmən laqeydlik və lağlağa ilə bir-birimizə virusu keçirdir və öldürürük. Qatil olmağımızdan utanmaq yerinə, vicdan əzabı çəkmək əvəzinə bizi qorumağa çalışanları qınayırıq!
Əminəm ki, başı onsuz da qarışıq olan polisin bizə bu qarışıqlıqda həkimlik, müəllimlik hətta dayəlik etmək üçün ürəyi getmir. Sadəcə polisin dövlətçilik tərbiyəsi bizdən daha yüksək olduğu üçün bəzən bizi qorumaq üçün heç bizim özümüzün fikrimizi də soruşmamalı olur!
Sizcə polis bizdən imtina etsə, bizi qorumasa daha yaxşı olardımı?
Əgər qorunmaq istəyiriksə biz də qorumalıyıq! Ən azından polisimizə dəstək olan sözümüzlə!
