Rus və Azərbaycan dillərində gündəlik çıxan "Kaspi” qəzetinin fəaliyyəti dayandırması haqda xəbər yayımlanıb.
AZXEBER.COM məsələni dəqiqləşdirmək üçün qəzetin baş redaktoru İlham Quliyevlə əlaqə saxlayıb.
O qəzetin maliyyə çətinlikləri yaşadığını, lakin tamamilə fəaliyyətini dayandırmadığını deyib:
"Kaspi” qəzeti bağlanmır, sadəcə bundan sonra həftədə bir dəfə nəşr olunması nəzərdə tutulur. Bu günə kimi gündəlik çıxırdıq. Sentyabrdan etibarən gündəlik nəşr olunmayacağıq. Çox güman ki, həftədə bir dəfə - şənbə günləri nəşr olunacağıq".
İlham Quliyev qəzetdə kütləvi ixtisarların getməsi haqda məlumata da münasibət bildirib: "Bizim kollektivdə 22 işçi var, onlardan 3-4-ü ilə yollarımızı ayırmağa məcbur olduq. Ancaq digər işçilər fəaliyyətini davam etdirir.
Sadəcə bildiyiniz kimi, yanvar ayından bəri KİVDF bizə maliyyə ayırmır və bu səbəbdən maliyyə sıxıntılarımız yaranıb. Həm də çap mediası yerini internet mediaya verib Bu baxımdan da internet saytımızın fəaliyyətini davam etdirir, hazırda da daxil olub görə bilərsiz ki, fəaliyyətimizi dayandırmamışıq".
Qeyd edək ki, bu gün unikal.org saytında "Sona Vəliyevanın qəzeti fəaliyyətini dayandırdı" başlıqlı xəbər yayımlanıb. Xəbərdə qeyd olunub ki, qəzetdə 50 nəfər rəsmi, 50 nəfərdən yuxarı isə qonorarla çalışan jurnalist çalışıb.
Günel Hüseynli,
AZXEBER.COM
AZXEBER.COM
