Kirayəçi hansı hallarda evdən çıxarıla bilər?
SOSİAL
22:50 13.07.2026
1080
Bəs kirayənişin hansı hallarda evdən çıxarıla bilər və bunun üçün hansı hüquqi əsaslar tələb olunur?
Hüquqşünas Əkrəm Həsənov Demokrat.az-a açıqlamasında kirayəçinin evdən çıxarılmasının yalnız qanunla müəyyən edilmiş əsaslar olduqda mümkün olduğunu deyib.
Onun sözlərinə görə, bu, ev sahibinin kirayəçini özbaşına və ya zor tətbiq etməklə mənzildən çıxara bilməsi anlamına gəlmir:
"Hətta kirayə müqaviləsinin müddəti başa çatsa və ya kirayəçi öhdəliklərini pozsa belə, mülkiyyətçi onu məhkəmə qərarı olmadan mənzildən çıxarmaq hüququna malik deyil. Kirayəçinin evdən çıxarılmasına səbəb ola biləcək əsas hallardan biri kirayə müqaviləsinin müddətinin başa çatmasıdır. Bu halda kirayəçi mənzili boşaltmalıdır. Digər əsas isə kirayəçinin müqavilə üzrə öhdəliklərini yerinə yetirməməsidir. Məsələn, kirayə haqqının uzun müddət ödənilməməsi, əmlaka zərər vurulması, mənzildən təyinatı üzrə istifadə edilməməsi və ya müqavilənin digər şərtlərinin pozulması ev sahibinə müqaviləyə xitam verilməsi və kirayəçinin çıxarılması üçün əsas yarada bilər”.
Hüquqşünas əlavə edib ki, qeyd olunan halların heç biri ev sahibinə kirayəçini özbaşına evdən çıxarmaq səlahiyyəti vermir:
"Mülkiyyətçi qapının kilidini dəyişmək, kirayəçinin əşyalarını çölə çıxarmaq, kommunal xidmətləri qəsdən dayandırmaq və ya başqa üsullarla onu mənzili tərk etməyə məcbur etmək hüququna malik deyil. Əgər kirayəçi mənzili könüllü şəkildə tərk etmirsə, mülkiyyətçi məhkəməyə müraciət etməlidir. Yalnız məhkəmənin qərarı əsasında kirayəçinin mənzildən çıxarılması həyata keçirilə bilər. Başqa sözlə, kirayəçinin evdən məcburi qaydada çıxarılması yalnız məhkəmə qərarı və qanunla müəyyən edilmiş icra prosedurları çərçivəsində mümkündür”.
OXŞAR XƏBƏRLƏR
ƏN SON XƏBƏRLƏR
