ABŞ Prezidentinin milli təhlükəsizlik üzrə müşaviri Mayk Uoltsun gələcəyi ilə bağlı Ağ Evdə aktiv müzakirələr gedir.
AZXEBER.COM "Report"a istinadən xəbər verir ki, buna səbəb ABŞ-nin Yəmənə qarşı hərbi əməliyyatları ilə bağlı məxfi məlumatın əldə edilməsi barədə xəbərlərin yayılmasıdır.
Qeyd olunub ki, M.Uoltsun istefası da istisna edilmir.
Məlumata görə, hələ heç nə qərarlaşdırılmayıb. Ağ Evdəki rəsmilər bildiriblər ki, Prezident Donald Tramp məlumat sızıntısı barədə xəbərlərdən sonra vəziyyətin inkişafını izləyir və yaxın günlərdə son qərarı verəcək.
Bununla yanaşı, Ağ Evdəki bəzi yüksək rütbəli köməkçilər hesab edirlər ki, M.Uolts Prezidenti "çətin vəziyyət”ə salmamaq üçün istefa verməlidir.
"Bu söhbəti "Signal” messencerində aparmaq məsuliyyətsizlik idi. Milli təhlükəsizlik üzrə köməkçi məsuliyyətsiz ola bilməz", - qəzet rəsminin sözlərini sitat gətirib. Administrasiyaya yaxın olan başqa bir şəxs isə öz növbəsində deyib: "Ağ Evdə hamı bir şeydə razılaşır: Mayk Uolts tam bir səfehdir".
Nəşrin başqa bir həmsöhbəti qeyd edib ki, M.Uoltsun gələcəyi D.Trampın baş verənlərə necə yanaşmasından asılıdır.
Xatırladaq ki, "The Atlantik" nəşrinin baş redaktoru Cefri Qoldberq təsadüfən ABŞ rəsmilərinin son dərəcə məxfi müzakirə qrupuna daxil olunub. Burada Pentaqon rəhbəri Pit Heqset guya ölkənin vitse-prezidenti Cey Di Vens, milli təhlükəsizlik üzrə müşavir Maykl Uolts və dövlət katibi Marko Rubio ilə Yəməndəki husi obyektlərinə zərbələr endirmək planlarını müzakirə edib. Heqsetin özü belə müzakirələrin messencerdə aparıldığı barədə məlumatı təkzib edib.
