Koronavirus infeksiyasına yoluxmuş yaşlı insanlarda Alsheymer xəstəliyinin əlamətləri müşahidə oluna bilər.
AZXEBER.COM Milli.az-a istinadən xəbər verir ki, alimlər xəstəliyin ağırlığından asılı olmayaraq koronavirusdan əziyyət çəkən şəxslərdə neyrodegenerativ dəyişikliklərin baş verməsi riskinin artmasını müşahidə ediblər.
Argentinada yaşlılar üzərində aparılmış müşahidələr nəticəsində xəstəliyə yoluxmuşların yaddaşlarında və düşüncələrində müəyyən dəyişikliklərin olduğu aşkar edilib.
Ekspertlərin Nyu-York sakinləri üzərində apardığı tədqiqat zamanı onların qanında demensiya ilə əlaqəli zülallar aşkar olunub. Məlum olub ki, koronavirusun erkən mərhələsində yaşlı xəstələrdə nevroloji simptomlar da yaranır.
Üç yüz nəfər yaşlı insan üzərində aparılmış müşahidələr göstərib ki, xəstəlikdən sonrakı 3 aydan 6 ayadək olan dövrdə onların 20%-də qısamüddətli yaddaş problemi, 34%-də isə daha ciddi pozuntular qeydə alınır.
Bundan əlavə, alimlər belə bir qənaətə gəliblər ki, koronavirusun söz tapmaqda problemin yaşanması və uzunmüddətli yaddaşla bağlı çətinliklər kimi fəsadları da ola bilər. Bu əlamətlər isə beyinin müəyyən funksiyalarının pozulmasının göstəricisidir.
Xatırladaq ki, koronavirus infeksiyası ötən ilin dekabrında Çinin Uhan şəhərində yayılmağa başlayıb. Hazırda virus dünyanın əksər regionları və ölkələrində yayılıb. Ümumdünya Səhiyyə Təşkilatı (ÜST) 2020-ci ilin fevralında 11-də infeksiyanın törətdiyi xəstəliyin adını COVID-19 qoyub, 2020-ci ilin martın 11-də isə koronavirusu pandemiya elan edib.
