Cəlilabad Rayon İcra Hakimiyyəti icra başçısının müavini Alıcı Dilavərovun koronavirusa yoluxması ilə əlaqədar yayılan məlumat haqda açıqlama verib.
AZXEBER.COM-a daxil olan məlumatı olduğu kimi təqdim edirik:
"Sosial şəbəkələrdə Cəlilabad Rayon İcra Hakimiyyəti başçısının müavini-Sosial-iqtisadi inkişafın təhlili və proqnozlaşdırılması şöbəsinin müdiri Alıcı Dilavərovun koronavirusa yoluxması ilə əlaqədar qarayaxma kampaniyasına başlanılıb.
Məsələnin mahiyyətindən xəbəri olmayanlar guya, Alıcı Dilavərovun Türkiyədən gəlmiş oğlunu karantindən çıxararaq ad günü keçirməsini və bunun nəticəsində çoxlu insanın koronavirusa yoluxmasını iddia edirlər.
Tam məsuliyyəti ilə bildiririk ki, bütün bunlar reallıqdan uzaq, qərəzli və böhtan xarakterlidir. Belə ki, Alıcı Dilavərovun iki oğlundan heç biri nəinki Türkiyə Respublikasına, hətta digər xarici ölkələrə heç vaxt getməyiblər. Araşdırma zamanı onların xarici pasportlarının belə olmadığı müəyyənləşdirilib.
Əslində Alıcı Dilavərov öz vəzifə funksiyasını yerinə yetirərək karantin rejimi dövründə əhali ilə sıx təmasda olub, onları maarifləndirib və karantin rejiminin tələblərinə ciddi əməl etməyə çağırıb. Həmçinin o, xarici ölkələrdən gətirilərək rayon mərkəzi xəstəxanasında karantinə alınan vətəndaşların problemləri ilə tanış olmaq üçün mütamadi surətdə onlarla görüşüb və problemlərinin aradan qaldırılmasına müvafiq kömək göstərib. Ola bilsin ki, onun koronavirus xəstəliyinə yoluxması həmin proseslə əlaqədardır.
Əlavə olaraq bildiririk ki, Rayon İcra Hakimiyyəti Azərbaycan Prezidenti İlham Əliyevin tapşırıqlarına müvafiq olaraq koronavirusa qarşı mübarizənin gücləndirilməsi üçün bütün zəruri tədbirləri görür, əhali arasında izahat işlərinin aparılmasına, yaşayış məntəqələrinin dezinfeksiya olunmasına, karantin tədbirlərinin tələblərinə əməl olunmasına prioritet məsələ kimi baxır”.
