"Mənim uşağımın ölümündə ən böyük günahkar həkimdir".
Bunu Sumqayıtda burun-boğaz əməliyyatından sonra dünyasını dəyişən 4 yaşlı Arzu Qurbanlının atası Sənan Qurbanlı deyib.
Ata uşağını əməliyyatdan əvvəl müayinədən keçirdiyini və heç bir problemin olmadığını, elə bu səbəbdən əməliyyata razı olduğunu bildirib. Onun sözlərinə görə, Arzunun həm boğazında, həm də burnunda artıq ət (adenoid) olub. Burnundakı ət uşağın nəfəs almasına böyük problem yaradırdı, ona görə də həkim valideynlərə uşağı dərhal əməliyyat etməyi məsləhət görüb.
"Biz İlham həkimi tanıyırdıq, başqa heç kimi. Tutaq ki, həkim əməliyyatı uğurla edib. Onda heç olmasa desin ki, günahkar narkoz verəndir. Narkozu çox verib. Çünki Arzu əməliyyatdan sonra ayıla bilmirdi".
Atanın sözlərinə görə, əməliyyat saat 13:00-da başa çatsa da, Arzu bircə dəfə saat 16:00-da ayılıb. "Daha sonra uşağın vəziyyəti pisləşməyə başlayıb. Ürək döyüntüləri 180-ə qalxıb. Mən də bununla bağlı həkimə zəng vurdum, o da dedi ki, iş vaxtı bitdiyindən evə gedib. Bir az onunla telefonda mübahisə etdikdən sonra saat 18 radələrində İlham həkim mənə zəng vurdu ki, xəstəxanaya qayıdıb və uşağın yanındadır. Həkim dedi ki, Arzunu oksigen aparatına qoşublar, vəziyyəti normallaşıb".
Sənan Qurbanlı deyir ki, axşam saat 22 radələrində yenə Arzunun halı pisləşib. Uşaq tünd rəngdə qan qaytarıb. Elə bundan sonra da dünyasını dəyişib.
Övladını itirən valideyn bu işin sonunadək gedəcəyini və çətin olsa da uşağı bir neçə dəfə ekspertiza etdirməyə belə razı olacağını deyib. "Heç olmasa, mənim övladımın başına gələnlər başqasının başına gəlməsin".
Arzu Qurbanlı Sumqayıtda özəl klinikalardan birində iyulun ilk günü burun-boğaz əməliyyatı olunub. Burun və boğaz ətinin kəsilməsi ilə bağlı əməliyyatdan sonra 4 yaşlı Arzu Qurbanlı bir neçə saat sonra dünyasını dəyişib.
Sayta açıqlamasında əməliyyatı edən həkim İlham Ağayev bildirib ki, uşağın ölməsinin əməliyyatla heç bir əlaqəsi yoxdur.
O, əməliyyatdan bir neçə saat sonra qaytarıb və onun nəfəs borusuna qida kütləsi gedib, bu da uşağın boğulmasına səbəb olub.
///anspress
