Fanatlar sosial şəbəkələrdə Lənkəran şəhər stadionunun önündə toplanacaqları barədə məlumat yayıblar. "Xəzər Lənkəran" azarkeşləri hər kəsi bu axşam saat 20:00-da "Fırtınalar Meydanı"nın önündə olmağa çağırıb. "FutbolPress"in Lənkərana ezam olunmuş əməkdaşının verdiyi xəbərə görə, 100-dən çox azarkeş Sütəmurdov körpüsündən stadiona doğru irəliləyərkən polis və mülki geyimli şəxslərin təzyiqilə üzləşiblər. Yaranmış qarşıdurma zamanı bəzi tərəfdarlar döyülüb, bir neçəsi polis bölməsinə aparılıb. Əməkdaşımızdan bura qədər məlumat almışıq. Bir qədər öncə isə sosial şəbəklərdə məlumat yayılıb ki, tutulanlar arasında əməkdaşımız Elvin Cəbiyev də var.
"FutbolPress"in əməkdaşı Elvin Cəbiyev başına gələnləri danışdı: "Polislər və mülki geyimli şəxslər körpünün yanından stadiona tərəf irəliləyən azarkeşləri oradan uzaqlaşdırmaq istəyirdilər. Həmin vaxt mənim press-kartım qırıldı, çaya düşdü. Sonra şəkil çəkəndə iki polis məni tutudu. Bunlardan qurtulmaq istəyəndə, başqa bir mülki geyimli şəxs də gəldi, məni maşına basdılar. Digər tutulanları vururdular. Adını bilmədiyim həmin mülki geyimli dedi ki, biz elə bu işlərə baxırıq, sonra oturdu sifətim üstünə. Başım dəmirə dəyirdi, qışqırırdım, buraxmırdı. Belə edəcəyik, sizi elə edəcəyik deyirdi. Bölmədə rəsi əvvəlcə dedi ki, sizə 15 sutka verəcəyik. Daha sonra mənə qayıtdılar ki, burdan çıxanda nəsə yazmayacağına söz ver, yoxsa tutulan digər azarkeşləri buraxmayacağıq. Dedim ki, mənə görə bu azarkeşləri saxlamayın, narahat olmayın, heç nə yazmayacam. Təxminən bir saat orda qaldıq".
