Azərbaycan Dillər Universitetində ADU-nun İnformasiya Resurs Kompleksi və BMT-nin Bakıdakı nümayəndəliyinin birgə təşkil etdiyi “21 May-Dialoq və inkişaf naminə ümumdünya mədəni müxtəliflik günü”nə həsr olunmuş tədbir keçirilib. Tədbirdə Azərbaycandakı müxtəlif Avropa və Asiya ölkələrinin səfirləri və səfirliklərin nümayəndələri, Bakının digər ali məktəbləri - Azərbaycan Diplomatiya Akademiyası (ADA) və Bakı Slavyan Universitetindən (BSU) qonaqlar iştirak ediblər.Tədbirdə ADU-nun rektoru, Milli Məclisin deputatı, professor Səməd Seyidov çıxışında bu günün tarixi əhəmiyyətindən söz açıb və eyni zamanda ölkədəki mədəni müxtəlifliyin mövcudluğunun beynəlxalq əlaqələrin inkişafında mühüm rol oynadığını vurğulayıb və gənclərin hər bir dövlətin mədəniyyəti ilə yaxından tanış olduqlarını söyləyib. Rektor bu istiqamətdə ADU-da bir çox mədəniyyət mərkəzilərinin uğurlu fəaliyyətlərindən danışıb. Səməd Seyidov bildirib ki, ADU mədəni müxtəlifliyi özündə birləşdirən bir mərkəzdir. Rəhbərlik etdiyi universitetin fəaliyyətindən danışan Səməd Seyidov bildirib ki, Dillər Universitetində hələ fəaliyyətinin başlanğıc mərhələsində ancaq ingilis, fransız və alman dillərinin tədris olunduğu halda, indiki dövrdə 15-ə yaxın ölkənin dilləri tələbələrə öyrədilir.Daha sonra BMT-nin Azərbaycandakı rezident Əlaqələndiricisi Antonius Bruk çıxış edərək bu günün tarixindən və vacibliyindən danışıb. O bildirib ki, mədəni müxtəliflik əməkdaşlığı daha da gücləndirir və mövcud olan stereotiplərin aradan qaldırılmasında kömək edir. O, BMT-nin bu yöndə gördüyü işlərdən, keçirilən bir sıra tədbirlərdən söz açıb.Sonra tələbələrin ifasında V. Şekspirin əsərlərindən ibarət monoloqlar nümayiş olunub.ADU-da fəaliyyət göstərən norveçli müəllim Roqnhild Torinin ingilis dilinə tərcümə etdiyi Nizami Gəncəvinin “Leyli və Məcnun” poemasının qısa təqdimat mərasimi keçirilib.Daha sonra 169 saylı orta məktəbin şagirdləri “Leyli və Məcnun” poemasından ingilis dilində səhnəciklər göstəriblər.Tədbirin ikinci hissəsi isə universitetin həyətində mini festival şəklində keçirilib. Festivalda 20-ə yaxın ölkənin mədəniyyyətlərini əks etdirən guşələr (bayraqlar, atributlar, suvenirlər) göstərilib, müxtəlif ölkələrin rəqsləri, mahnıları nümayiş olunub.Qeyd edək ki, “21 may - Dialoq və İnkişaf naminə ümumdünya mədəni müxtəliflik günü” BMT Baş Assambleyasının 2003-cü ilin fevralın 20-də qəbul edilən qətnaməsindən sonra hər il qeyd olunur.