Kim kimdən gizlənir? Son zamanlar gündəmi zəbt edən Milli Şura ideyası müxtəlif formalarda şərh olunur. Belə ki, bəzi politoloqlar bu ideyanın da İctimai Palata kimi uğursuz olacağını, millətə heç bir fayda verməyəcəyini düşünür. Şuranın təsisçilərindən olan tanınmış dramaturq və rejissor Rüstəm Ibrahimbəyov rəhbərlik etdiyi Milli Şura layihəsindən heç cür imtina etməyəcəyini bəyan edib və şuranın cəmiyyətin, millətin həyatında böyük dəyişikliyə yol açacağını deyib. Halbuki, politoloqlar bu şuranın heç bir perspektivi olmadığını, “mehriban düşmənlərin” birliyinə inanmadığını deyir.

“El” hərəkatının Ali Məclis üzvü Eldəniz Quliyev mətbuata açıqlamasında bildirib ki, “Milli Şuranın tərkibi gələn həftə elan olunacaq. Ola bilsin, İsa Qəmbər həmin gün tədbirdə olmasın. Allah göstərməsin o, xəstələnə bilər, başqa işi çıxar, yaxud da xaricdə ola bilər. İstər İsa Qəmbər, istərsə də Rüstəm İbrahimbəyov Milli Şuranın təsis iclasında olmaya bilər. Ancaq bu, heç nəyi dəyişmir. Milli Şuranın nüvəsində Müsavat partiyası və İsa Qəmbər, AXCP və Əli Kərimli, həmçinin Eldar Namazov və “El” hərəkatı dayanır. Bu adamlar 6 aydan yuxarıdır ki, bu işin təşkilatçılığı ilə məşğuldur”. Bəs bu şuranın yaradıcıları özləri açılışda iştirak etməmələri nədən xəbər verir? Öncədən bu cür bəyanatla çıxış etmək, nəyi, kimdən sığortalamaqdır? Bu cür addımlar əslində cəmiyyət içində özlərinin “nüfuzlarını” sığortalamaq kimi qəbul edilir. Belə ki, cəmiyyətdə bu cür fikir tez-tez səslənir ki, təsisçilər də şuranın uğursuz olacağına əmindirlər. “Onlar layihənin uğursuz olmasından ehtiyat edirlər. Əgər layihə uğursuz alınarsa, o zaman müxalifətin birdəfəlik sonu olacaq və onların bütün siyasi perspektivi zərbə altında qalacaq"Əminliklə demək olar ki, bu şura artıq ölü doğulub. Təsisçilərin ilk qurultayda iştirak etməməsi də onu göstərir ki, müxalifət liderləri belə şuraya ciddi yanaşmır. Müxalif partiya gənclərinin bütün günü sosial şəbəkələrdə bir-birlərini qırması, təhqir etməsi də onu göstərir ki, bu adamlar heç vaxt birləşə bilməyəcək. Bütün günü Milli Şura ideyalarından, xalqı "ağ günə çıxarmaqdan" danışan Rüstəm İbrahimbəyov özünə əziyyət verib Bakıya gəlmir. Müsavat başqanı İsa Qəmbər isə deyəsən, "mehriban düşməni" Əli Kərimlini görməmək üçün təsis qurultayına qatılmayacaq. İllərdir vahid namizəd axtarışına çıxan və hələ də tapa bilməyən Müsavat-AXCP cütlüyünün düşmənçiliyi elə Milli Şuranı da yaranmamış dağıdacaq.  Qeyd edək ki, mayın 28-də Azərbaycan Demokratik Respublikasının 95 illiyində Milli Şuranın təsis ediləcəyi gözlənilir.AZXEBER.COM