Tələbə Qəbulu üzrə Dövlət Komissiyasının sədri Məleykə Abbaszadə bildirib ki, komissiya Tibb Universitetini bitirən oğlanların bu imtahanda iştirak etməsi üçün onların iyulda deyil, oktyabrda hərbi xidmətə çağırılması ilə bağlı Müdafiə Nazirliyinə rəsmi müraciət edib. Lakin bu yalnız Tibb Universitetinin məzunlarına aiddir. Bu, özəl ali məktəblərin tibb ixtisasını bitirənlərə şamil edilmir.
“Məsələ ondadır ki, onları indi hərbi çağırışdan azad etmək bizim vəzifəmiz deyil. Özəl universitetlər yalnız tələbələrin sayını güdür. Onlar tələbələrin çox olmasını istəyir. 200 bal ilə onları məmnuniyyətlə universitetə qəbul edirlər. Görürsünüz, Odlar Yurdu 200 balla qəbul edir”, – deyə Məleykə Abbaszadə vurğulayıb.
