Qeyri-neft sektorunun prioritet istiqamətlərindən biri olan mebel sənayesi son illər həm yerli istehsalın artması, həm də ixrac potensialının genişlənməsi baxımından xüsusi diqqət mərkəzindədir. Sektorun inkişafı təkcə iqtisadi göstəricilərlə məhdudlaşmır – o, məşğulluğun artırılması, sahibkarlıq mühitinin təkmilləşdirilməsi və yeni biznes əməkdaşlıqlarının qurulması üçün də önəmli platformadır. Bu fonda keçirilən sektorial görüşlər dövlət-özəl tərəfdaşlığının gücləndirilməsi, institusional dəstəyin səmərəli çatdırılması və sənayenin gələcək inkişaf xəttinin müəyyənləşdirilməsi baxımından mühüm əhəmiyyət kəsb edir.
Mövzu ilə bağlı Milli Məclisin deputatı Vüqar Bayramov Crossmedia.az-a açıqlama verib:
"Real sektorun dəstəklənməsi və biznesin inkişafı müasir yanaşma tələb edir. İnkişaf etmiş ölkələrin təcrübəsi göstərir ki, iş adamları, dövlət qurumları və ictimai təşkilatların bir araya gələrək müxtəlif məsələləri müzakirə etməsi real sektorun inkişafı üçün mühüm imkanlar yaradır. Belə platformalar həm dialoq, həm də əməkdaşlıq mühiti formalaşdırır. Artıq Azərbaycanda da bu cür müzakirələr təşəbbüslər səviyyəsindən çıxaraq praktiki əməkdaşlıq müstəvisinə keçməkdədir. Fərqli sektorlar üzrə ixtisaslaşmış şirkətlərin "Marsol” Group-un təşkilatçılığı ilə keçirilən görüşlərdə dövlət qurumlarının nümayəndələrinin iştirak etməsi, dövlət–biznes dialoqunun daha da genişləndiyini göstərir".
Deputat həmçinin bildirib:
"Bu prosesdə ictimai təşkilatların körpü rolu oynaması xüsusilə önəmlidir. Çünki biznes nümayəndələrinin mövqeyinin, təkliflərinin və çağırışlarının dövlət qurumları tərəfindən dinlənilməsi və nəzərə alınması iqtisadi siyasətin daha çevik formalaşmasına şərait yaradır. Bu baxımdan, sözügedən platformanın daha da genişləndirilməsi və müxtəlif sektorları əhatə etməsi real sektorun inkişafı üçün yeni imkanların açılmasına, eləcə də dövlət və özəl sektor arasında qarşılıqlı etimadın güclənməsinə səbəb olacaq".
Xatırladaq ki, oktyabrın 7-də İş Adamları Cəmiyyətinin Milli Assosiasiyasının (İCMA) Mebel Komissiyasının təşəbbüsü və təşkilatçılığı ilə mebel sənayesində fəaliyyət göstərən sahibkarların iştirakı ilə sektorial axşam ziyafəti keçirilib.
Ziyafətin xüsusi qonaqları sırasında Dövlət Məşğulluq Agentliyinin İdarə Heyətinin sədri Sadiq Əliyev, Kiçik və Orta Biznesin İnkişafı Agentliyinin (KOBİA) İdarə Heyəti sədrinin müavini Samir Hümbətov, Dövlət Vergi Xidmətinin Vergi Siyasəti Baş idarəsinin rəisi Nicat İmanov, Dövlət Gömrük Komitəsinin Gömrük siyasəti Baş idarəsinin nümayəndəsi Rövşən Namazov, eləcə də İCMA-nın İdarə Heyətinin sədri Tural Mustafayev yer alıblar.
