Xəbər verdiyimiz kimi, məktəblərdə İntizam Şurası yaradılacaq. Bu barədə Elm və Təhsil Nazirliyindən məlumat verilib.
Bildirib ki, şuranın yaradılması və tərkibində valideynlərin təmsil olunması məcburi olacaq.
Bəs İntizam Şurasının yaradılması məktəblərdə hansı dəyişikliklərə səbəb olacaq?
Mövzu ilə bağlı AZXEBER.COM-a açıqlamasında təhsil eksperti Elçin Əfəndi sualları cavablandırıb.
O, qeyd edib ki, bu, məktəblərdə nizam-intizamı tənzimləmək üçündür:
"Yeni qəbul olunmuş qərar əsasında şagirdlərin konkret olaraq nizam-intizam qaydalarına riayət etmələri ilə bağlı müvafiq tapşırıqlar verilir və müvafiq qərarlar alınır. Əgər kimsə riayət etməzsə, onlar haqqında tədbirlər görüləcək. Bu tədbirlərin həyata keçirilməsi ilə bir növ məktəblərarası nizam-intizam qaydaları, şagirdlərarası münasibətlər, şagir-müəllim və ya rəhbərlikarası münasibətlərin düzgün qurulmasına, hər şeyin etik kodekslər daxilində olmasına hesablanır".
Ekspert bildirib ki, bu cür qayda-qanunun tətbiqi doğrudur:
"Əlbəttə, məsələyə yalnız bu aspektdən baxanda müəyyən məhdudiyyətlərin, qadağaların tətbiqi doğrudur. Çünki təhsil müəssisəsində qaydalar pozulduqda tədbir görülməlidir. Amma məsələnin həlli üçün ilkin olaraq ciddi nəzarət mexanizminin tətbiqi vacibdir. O baxımdan ki, bu gün biz hər hansı bir şagirdə xəbərdarlıq ediriksə və ya ondan sonrakı mərhələdə o şagirdlər haqqında uzaqlaşdırma qərarı alınırsa, burada artıq həmin o nəzarət mexanizmi daha ciddi şəkil almalı və başqa adekvat qərarlar qəbul etməməlidir. Bu halların yaranma səbəbində valideynlər, xüsusi olaraq da təhsilalanın qohum-əqrəbası, tanışı bir növ fürsət axtaracaq ki, hər hansı bir üsulla uzaqlaşdırma məsələsinin üzərindən xətt çəksinlər. Yəni, artıq burada dediyim mexanizm işləməlidir. Yalnız o zaman biz bu tətbiqlərin həqiqi olduğuna şübhə etməyəcəyik. Formal xarakter daşıdığını qeyd etməyəcəyik".
Ekspert həmçinin qeyd edib ki, təlim-tərbiyə ilkin olaraq ailədən başlayır:
"Bu gün 4 min 440-dan çox təhsil müəssisəsi fəaliyyət göstərir və burada 1 milyon 30 mindən çox təhsilalan var. Nəzərə alsaq ki, bu şagirdlərin hər birinin müxtəlif psixologiyası var, onların ilkin təlim-tərbiyə prosesi məhz ailələrdən başlanır. Bununla paraleldə onlar məktəblərdə təhsil, təlim-tərbiyə alırlar. Günün çoxunu orada keçirirlər, bu məsələlərlə məşğul olan müəllimlər az da olsa, məsuliyyət daşıyırlar. Çünki istənilən halda hər hansı bir situasiya baş verirsə, bu da neqativdirsə, bu haqda vaxtında və düzgün məlumat verilməli və tədbir görülməlidir".
"Qaldı ki, məktəbdə saxlanılma müddətinə, bu, verilən qərardan asılıdır. 10 dəqiqə də ola bilər, 20 dəqiqə də ola bilər və ya bir saat. Bu saxlanılma şagirdin bir növ prosesə daha çox meyl etməməsi və törətdiyi hər hansı bir mənfi halı təkrar etməməsi üçün inzibati tənbeh üsuludur, - deyə ekspert əlavə edib.
Aydın Nuri
