İtaliyanın baş naziri Giorgia Meloni və Fransa prezidenti Emmanuel Makron Romada Aİ-nın güclənməsi, Ukrayna-Rusiya müharibəsi və Yaxın Şərqdəki prosesləri müzakirə ediblər.
AZXEBER.COM xarici mediaya istinadən xəbər verir ki, İtaliyanın baş naziri Giorgia Meloni və Fransa prezidenti Emmanuel Makron İtaliyanın paytaxtı Romada görüşüb.
Meloni dünən axşam saatlarında Çigi Sarayının həyətində Makronu rəsmi mərasimlə qarşılayıb. Liderlər Avropa İttifaqının (Aİ) üzləşdiyi çağırışları və onlara qarşı Birliyin gücləndirilməsini, həmçinin Ukrayna müharibəsini və Yaxın Şərqdəki hadisələri müzakirə ediblər. Təxminən 3 saat davam edən ikitərəfli görüşdən sonra nümayəndə heyətləri arasında iş yeməyindən sonra ortaq yazılı açıqlama verilib.
Baş nazirliyin yaydığı açıqlamada bildirilir ki, İtaliyanın Baş naziri Corciya Meloni ilə Fransanın Prezidenti Emmanuel Makron 2025-ci il iyunun 3-də Romada görüş keçiriblər. Görüşdə Avropanın qarşısında duran artmaqda olan ortaq çağırışlar fonunda, qitənin hərəkətə keçməsi və səfərbər olunması istiqamətində atılan addımlar ətraflı şəkildə müzakirə olunub və əlaqələndirmə aparılıb. Açıqlamada qeyd edilir ki, İtaliya və Fransa Avropa layihəsinin qurucu ölkələri kimi sülhə sadiq qalaraq, öz maraqlarını müdafiə edə bilən, vətəndaşlarını qoruya bilən daha güclü və daha firavan Avropa qurmaq məqsədilə birgə öhdəliklərini gücləndirmək niyyətindədirlər.
Görüş zamanı Avropanın rəqabət qabiliyyəti və rifahına dair gündəlikdə tam uyğunluğun olduğu vurğulanıb. Bildirilib ki, Fransa və İtaliya qarşıdan gələn Aİ Liderlər Zirvəsinə hazırlıq, yeni çoxillik maliyyə çərçivəsi, miqrasiya, Aİ-nin genişlənməsi və islahatlar mövzularında əməkdaşlıq etməkdə qərarlıdırlar.
Həmçinin açıqlamada Ukrayna-Rusiya müharibəsinin də müzakirə olunduğu qeyd edilib: "Rusiyanın Ukraynaya təcavüzünün üzərindən üç il keçdiyi və İstanbulda Ukrayna ilə Rusiya arasında sonuncu danışıqlardan sonra, Fransanın və İtaliyanın Ukraynaya verdiyi sarsılmaz və tərəddüdsüz dəstək ədalətli və davamlı həll yolunun əldə olunması baxımından hər zamankından daha vacibdir. Bu dəstək Avropanın müdafiəsinə investisiya səviyyələrinin artırılmasını və Avropanın sənaye və texnoloji müdafiə infrastrukturunun dəstəklənməsini nəzərdə tutan daha iddialı dəyişiklikləri də əhatə edir.”
Oksana
