Bu gün Bakı Ağır Cinayətlər Məhkəməsində Xətai rayonu ərazisində 9 mərtəbəli yaşayış binasında baş verən yanğın hadisəsi ilə bağlı təqsirləndirilən Fərid Sadıqov, Zaur Əşrəfov və Nüsrət Muxtarovun cinayət işi üzrə məhkəmə prosesi davam etdirilib.
Hakim Eldar İsmayılovun sədrliyi ilə keçirilən prosesdə zərərçəkmiş şəxslər ifadə verib. Onların hər biri təqsirləndirilən şəxsləri tanımadıqlarını və şikayətçi olmadıqlarını deyiblər.
Zərəçəkmiş Nüşabə Hüseynova yanğının necə baş verdiyini danışıb. O deyib ki, hadisə zamanı evdə olublar: “Biz dördüncü mərtəbədə yaşayırıq. Evdən çıxanda ikinci mərtəbədə tüstüdən heç yerə gedə bilmədik. Pəncərəni sındırdılar. Uşağı aşağı atıb, qışqırdıq ki, tutun”.
N.Hüseynova və digər zərərçəkən Aydın Məmmədov mənzillərinin yanmadığını, amma tüstüdən evlərinin qaraldığını və yanğın söndürülən zaman vurulan suyun evə dolduğunu deyiblər. Hər ikis şəxs onlara dəyən maddi ziyana görə kompensasiya almadıqlarını bildiriblər və qeyd ediblər ki, təzminatın ödənilməsini tələb edirlər.
Vəkil vəsatət təqdim edərək təqsirləndirilən Fərid Sadıqovun ibtidai istintaqa verdiyi ifadəsindən imtina etdiklərlərini bildirib. Vəsatətdə qeyd edilib ki, F.Sadıqovdan “TNH” şirkəti ilə bağlı alınan məlumatlar müstəntiq tərəfindən onun ifadəsi kimi qeydə alınıb. F.Sadıqov isə oxumadan həmin ifadəyə qol çəkib.
Vəsatət baxılmamış saxlanılıb.
Məhkəmə prosesi iyulun 12-də davam etdiriləcək.
Qeyd edək ki, hadisə ötən il aprelin 10-da Bakı şəhəri, Xətai rayonu, Zığ yolu küçəsi 16 saylı ünvanda baş verib.
///"Qafqazinfo"
