Futbolçu ildə 18 milyon avroya çatdırılmasını tələb etməyə hazırlaşır
İspaniyanın “Barselona” futbol klubunun hücumçusu, 26 yaşlı argentinalı Lionel Messi klubun rəhbərliyindən məvacibinin təxminən iki dəfə artırılmasını, yəni indiki 10,5 milyon avronun artırılıb ildə 18 milyon avroya çatdırılmasını tələb etməyə hazırlaşır.
AzərTAc xarici KİV-lərə istinadla xəbər verir ki, klubun rəhbərliyi razılıq versə, L.Messi dünyada ən yüksək məvacibli futbolçuya çevrilə bilər.
“Punto Pelota”nın məlumatına görə, L.Messi klub yoldaşı braziliyalı Neymardan və Madridin “Real” klubunun oyunçusu portuqaliyalı Kriştianu Ronaldudan daha çox qazanmaq istəyir. Neymarın məvacibi iki hissədən ibarətdir: 7 milyon avro məvacib kartı üçün nəzərdə tutulub, 10 milyon avro isə bonusdur. Ronaldu da 17 milyon avro məvacib alır. Lakin yeni müqaviləyə görə, bu futbolçu 18 milyon avro qazanacaq.
İspaniya jurnalistlərinin məlumatına görə, L.Messi 3-5 milyon avro məbləğində bonuslara ümid bəsləyir. Bu, onun ildə 23 milyon avro qazanmasına imkan verəcək.
Lionel Messi Devid Bekhem və Kriştianu Ronaldudan sonra ən yüksək məvacibli futbolçuların reytinqinin ilk onluğuna daxildir. Bekhemin may ayında karyerasının başa çatdığı elan etməsini nəzərə alsaq, L.Messinin pullu futbolçular arasında lider olması yolunda yeganə rəqib Ronaldudur.
