Məzuniyyət pulu ilə bağlı açıqlama - Qaydalar dəyişib
SOSİAL
21:39 12.08.2026
8457
İşçi məzuniyyətə çıxmayıb həmin günlərə görə əlavə pul ala bilərmi? Bu hansı hallarda mümkündür?
Demokrat.az-a bu barədə açıqlama verən Vətəndaşların Əmək Hüquqları Liqasının sədri Sahib Məmmədov bildirib ki, əmək Məcəlləsinə edilən son dəyişikliklərə əsasən, işçi əmək məzuniyyətinə çıxmaqla bağlı ərizə təqdim etmədikdə belə, bu, onun məzuniyyətdən istifadə etməməsi üçün əsas olmayacaq:
"Belə ki, işəgötürən işçiyə əvvəlcədən yazılı xəbərdarlıq etməklə və müəyyən olunmuş məzuniyyət qrafikinə əsasən öz sərəncamı ilə onu əmək məzuniyyətinə göndərə bilər. Bu dəyişikliklə əvvəlki dövrdə bəzi işçilərin məzuniyyətdən istifadə etməmək üçün qəsdən ərizə verməməsi və ilin sonunda istifadə edilməmiş məzuniyyət günlərinə görə kompensasiya almağa çalışması kimi halların qarşısının alınması məqsədi daşıyır. Yəni bundan sonra işçinin ərizə yazmaması avtomatik olaraq onun məzuniyyətdən istifadə etməməsinə və sonradan buna görə kompensasiya tələb etməsinə imkan verməyəcək”.
Onun sözlərinə görə, işçi müəyyən səbəblərdən əmək məzuniyyətindən istifadə etməyibsə və sonradan əmək müqaviləsinə xitam verilirsə, həmin şəxsin istifadə etmədiyi əsas və əlavə məzuniyyət günlərinə görə kompensasiya almaq hüququ saxlanılır:
"Bu məsələ də Əmək Məcəlləsində öz əksini tapıb. Beləliklə, yeni qaydalar bir tərəfdən əmək məzuniyyətindən vaxtında istifadəni təmin edir, digər tərəfdən isə əmək müqaviləsinə xitam verilərkən işçinin istifadə etmədiyi məzuniyyət günlərinə görə kompensasiya hüququnu qoruyur”.
Beləliklə, məzuniyyət pulunu yalnız işdən çıxarkən kompensasiya şəklində almaq mümkündür.
OXŞAR XƏBƏRLƏR
ƏN SON XƏBƏRLƏR
