Millət vəkili Qənirə Paşayeva Los Ancelosda Azərbaycan və türk diasporunun rəhbərləri, fəalları və Azərbaycanın Los-Ancelosdakı baş konsulu Nəsimi Ağayevlə görüşüb. Millət vəkili Qənirə Paşayeva harada doğulmasından və harada yaşamasından asılı olmayaraq hər bir Türk insanının, dünyanın müxtəlif ölkələrində fəaliyyət göstərən Azərbaycan və türk diaspora təşkilatlarının Xocalı Soyqırımı, Qarabağ həqiqətlərinin dünyaya çatdırılması, bu soyqırımı törədənlərin öz layiqli cəzasını alması üçün birlikdə çalışmalarını sürətləndirmələrinin vacibliyini vurğulayıb. Millət vəkili Qənirə Paşayeva ABŞ-da fəaliyyət göstərən Azərbaycan və türk diaspor təşkilatlarının koordinasiya olunmuş şəkildə bir-birlərinə sıx dəstək vermələrinin və Türk dünyasını narahat edən bütün problemlərin həllinə dəstək göstərmək üçün bərabər çalışmalarının daha da artırılmasının vacibliyini xüsusi diqqətə çatdırıb. Azərbaycan və türk diaspor təşkilatlarının nümayəndələri Azərbaycan həqiqətlərinin yayılması, Azərbaycan mədəniyyətinin Loc Ancelsdə eləcə də yaxın bölgələrdə daha geniş çatdırılması və təbliği istiqamətində səylərini bundan sonra daha da artıracaqlarını bildiriblər və bu istiqamətdə görülən işlər və həyata keçirməyi planlaşdırdıqları layihələr barədə millət vəkilinə məlumatlar verib, təkliflərini səsləndirib. Görüşdə qarşılıqlı maraq doğuran məsələlər ətrafında fikir mübadiləsi də aparılıb.
Millət vəkili Qənirə Paşayeva Los-Ancelosa səfəri çərçivəsində Azərbaycanın Los-Ancelosdakı baş konsulluğumuzu ziyarət edib və Azərbaycanın Los-Ancelosdakı baş konsulu Nəsimi Ağayevlə görüşüb və fikir mübadiləsi aparılıb.
