Azərbaycan Milli Məclisinin bu gün keçirilən iclasında Mərkəzi Bankın manatla bağlı verdiyi son qərar müzakirə mövzusu olub.
APA-nın məlumatına görə, deputat Fərəc Quliyev Mərkəzi Bankın manatla bağlı atdığı addımın narazılığa səbəb olduğunu bildirib. O yaranmış vəziyyətdən sui-istifadə hallarından vətəndaşların təlaş keçirdiyini deyib: “Hökumət antiböhran proqramını işə salmalıdır”.
Deputat Milli Məclisin müvafiq komitəsində müzakirələr aparmağın vacib olduğunu da bildirib.
Deputat İqbal Ağazadə isə Mərkəzi Bankın manatın kursunun sabit saxlanılacağı barədə özünün yaydığı press-relizin əleyhinə qərar verdiyini deyib. O, baş verənlərin bahalaşmaya səbəb olduğunu, əhalinin bundan narahatlıq keçirdiyini bildirib. Deputat qeyd edib ki, manatın ucuzlaşması əhalinin banklardakı əmanətlərinə də təsir edəcək, buna görə vətəndaşlara kompensasiya verilməlidir.
Zahid Oruc isə deyib ki, Mərkəzi Bankın qərarını millətin mənafeyinə uyğun hesab edir: “Maksimum bir ay ərzində onlar da Mərkəzi Bankın qərarını bizim kimi müdafiə edəcəklər. Bunu tədricən etmək dollar milyonçularının xeyrinə idi. Mən bu qərarı açıq şəkildə müdafiə edirəm”.
Spiker Oqtay Əsədov deyib ki, əhalinin banklardakı vəsaitinə ziyan dəyməsi barədə deyilənlər yalandır: “Son bir-iki ay ərzində banklar tərəfindən vətəndaşların həmin pulları dəyişdirilib. Mərkəzi Bank manatın devalvasiyasının qarşısının alınması üçün addımlar atıb, bundan sonra da atacaq. Dünyada ciddi proseslər gedir, bilmək olmur ki, sabah nə baş verəcək. Həmçinin nəzərə alsaq ki, Azərbaycan müharibə vəziyyətindədir, bu məsələdə xüsusi ajiotaj yaratmağa ehtiyac yoxdur. Amma o da doğrudur ki, bəzi mağaza, supermarket sahibləri süni qiymət artımı yaratmağa çalışır. Bu, yolverilməzdir. Çünki satılan məhsulların 70 faizi ölkədə istehsal olunur. Həm də mağazalarda satılan mallar manatın devalvasiyasından öncə gətirilib, qiymətləri niyə qaldırırlar?”
Deputat Siyavuş Novruzov isə deputat həmkarlarını populizmdə qınayıb: “Bu məsələdə populizmlə ehtiyac yoxdur. Hökumət özü mart ayında hesabatında bu məsələyə bir daha aydınlıq gətirəcək”.
Deputat Qüdrət Həsənquliyev devalvasiya nəticəsində ərzaq məhsullarının qiymətinin qalxmasından daha çox aztəminatlı ailələr zərər görür.
Deputat bunun nəzərə alınmasını, ünvanlı sosial yardımın artırılmasını təklif edib: “Eyni zamanda sosial yardım alanların sayının azalması üçün tədbirlər görmək lazımdır. İnsanlar işlə təmin edilməli, halal zəhmətlə dolanmalıdırlar ki, bu xərclər büdcədə azaldılsın”.
